Recent Posts

Breaking News

P100M trabaho sa CCMC gi-award


ANG Cebu City Government mi-award na sa P100 milyon nga kontrata ngadto sa kontractor nga motiwas sa tulo ka andana sa bag-ong edipisyo sa Cebu City Medical Center (CCMC) para magamit na labina ning panahon sa Covid-19 pandemic.

Si Rodjun Taneo, chairman sa Bids and Awards Committee (BAC) para sa imprastraktura, nagkanayon nga sugdan ang pagtrabaho sa 3 ka andana karong Hulyo 28 o unang semana sa Agusto nga gikatakdang mahuman paglabay sa 6 ka mga buwan.

“Ang notice to proceed (NTP) na award na ngadto sa contractor so by the end of July or first week of August mag start na ang construction sa interior sa 3 floors,” padayag ni Taneo.

Ang iyang gipasabot mao ang construction sa architectural, electrical, mechanical installations lakip na ang fire protection sa edepisyo.

Si City Administrator Floro Casas Jr. nipahibawo nga nihatag kanila og marching order si Mayor Edgardo Labella pagpadali sa program of works and estimates (POWE) para sa P500 milyones nga giaprobahan sa konseho para pagtukod sa ika-7 hangtod ngadto sa ika-10 nga andana para sa labing moderno nga tambalanan sa City Government.

Karong Agusto, gipanglantawan nga mahuman na ang Powe ug masulod na sa BAC ang maong proyekto para masugdan na ang procurement process.

Sa Septiyembre, posible nga mahuman na ang proseso ug ma-award na ang NTP ngadto sa mananaog nga kontraktor ug masugdan na ang pagtrabaho sa upat ka andana sa buwan sa Setyembre.

“At least ang half billion mao nay makakumpleto sa structure sa 10 floors nga molanat og 6-8 months for the substantial completion of the structural nga mo-coincide sad sa completion sa 3 floors that will be operational that time,” dugang ni Taneo.

Si Casas sa iyang bahin nagkanayon nga wala na kinahanglana ang ad hoc committee sa City Council nga maoy gusto ni Bise Mayor Michael Rama kinsa maoy mangulo sa komitiba sanglit siya sab ang chairman sa committee on health.

“Kanang ilang plano nga buhaton, sama sa implementation sa plano, that’s purely an executive function, beyond na sa scope sa Sanggunian who is only to enact laws/ordinances, pass lang mo sa appropriation ordinance then the mayor on the executive department maoy mo-implement,” matod ni Casas.

Dugang niya nga labing maayo nilang buhaton, inay ad hoc committee ang himuon sa konseho, moumol sila og oversight committee para maoy motutok sa CCMC aron masubay ug madali ang pagkahuman niini. (PAC)


Source: Sun.Star Superbalita (https://www.sunstar.com.ph/article/1864211/Superbalita-Cebu/Balita/P100M-trabaho-sa-CCMC-gi-award?ref=rss&format=simple&link=link)

No comments