Recent Posts

Breaking News

P100M pagtiwas sa CCMC i-award na


GIKATAKDANG i-award na sa sunod semana ngadto sa usa ka kontraktor ang P100 milyunes alang sa pagtiwas sa unang tulo ka mga andana sa bag-ong edipisyo sa Cebu City Medical Center (CCMC) sa dan Panganiban eskina sa N. Bacalso Ave., dakbayan sa Sugbo.

Ang maong pundo gamiton para sa architectural, electrical ug mechanical installation para magamit na ang maong ospital labi na ning panahon sa Covid-19 pandemic.

Apil usab nga itaod ang fire alarm and detection system (FDAS) ug fire protection.

Ang technical working group sa Bids and Awards Committee (BAC) nahuman na sa ilang post qualification sa kontraktor nga lowest bidder.

Si Mayor Edgardo Labella nagkanayon nga gipasalig sa kontraktor nga tulo ka buwan gikan sa pagtunol sa notice of award, ilang mahuman og trabaho ang CCMC.

Ang CCMC gisugdan pagtukod niadtong 2015 diin si Bise Mayor Michael Rama pa ang mayor sa dakbayan, kinsa napildi ni kanhi Mayor Tomas OsmeƱa sa piniliay sa 2016.

Si Labella nibutyag nga trabahuon na usab sa (BAC) para mapahigayon ang public bidding sa P500 milyones nga bag-ohay lang naaprobahan sa City Council.

Ang mayor nangayo og dugang P1.5 bilyones sa konseho para matiwas na ang 10 ka andana nga CCMC apan P500 milyones ra ang giaprobahan sa konseho nga gipangulohan ni Rama.

Determinado si Labella nga sulod sa iyang unang tulo ka tuig isip mayor, iyang mapahuman ang 10 ka andana nga CCMC. (PAC)


Source: Sun.Star Superbalita (https://www.sunstar.com.ph/article/1862654/Superbalita-Cebu/Balita/P100M-pagtiwas-sa-CCMC-i-award-na?ref=rss&format=simple&link=link)

No comments