Recent Posts

Breaking News

'Oplan Patagam' nagbahad


DIGOS CITY -- Giklaro sa kapulisan ning siyudad nga nagpadayon ang "Oplan Patagam" kon diin nagbahad nga dakpon gyud ang mga di motuman sa gitakdang polisiya sa Inter-agency Task Force (IATF) on Covid-19.

Uwahing nasikop ang 125 ka mga indibiduwal human milapas sa executive order sa lokal nga gobyerno.

Sumala ni Lieutenant Colonel Vici Anthony Tababa, hepe sa Digos City Police Station, nga sa mga nasikop, 35 ang wa magsul-ob og face mask, 40 ang wa motuman sa social distancing ug 50 ang gi-isyohan og citation ticket human milapas sa balaod trapiko.

Matud ni Tababa nga ilawom sa modified general community quarantine (MGCQ), magpadayon ang istriktong pagpatuman sa mga gitakdang protocol sa IATF-Covid-19.

Naningkamot ang kapulisan ug lokal nga gobyerno nga di mokuyanap ang kagaw sa dakbayan mao nga angayang motuman ang matag indibiduwal sa mga gilatid sa guidelines.

Na-obserbahan sa mga awtoridad nga gibalewala na sa uban ang mga gitakdang polisiya mao nga nagbahad silang padayon nga ipatuman ang Oplan Patagam.

Samtang mapasalamaton sab ang Digos City police ngadto kang Mayor Josef Cagas human nakadawat sila og 4 ka bag-ong NMAX 155 nga motorsiklo.

Sumala ni Tababa nga maglusad na ang istasyon og Panther motorcycle cops aron mas dali ang pagpatrolya sa dakbayan.

Gihatagan sa lokal nga gobyerno ang upat ka mga motor sa tinguha sa mayor nga mas mapalambo pa ang pagpatuman sa kapulisan sa kahapsay'g kalinaw sa dakbayan.

Usa sa tutukan sa mga naka-motorsiklong pulis mao ang malapason sa balaod trapiko. (Orlando B. Dinoy)


Source: Sun.Star Superbalita (https://www.sunstar.com.ph/article/1862617/Superbalita-Davao/Balita/Oplan-Patagam-nagbahad?ref=rss&format=simple&link=link)

No comments