Recent Posts

Breaking News

'Nangilog og uyab' gitipi


DAVAO DE ORO - Patay ang lalaki nga naka-quarantine sulod sa Barangay Isolation Unit (BIU) human gikamang ug giluba sa suspek nga giingong giilogan niini og uyab.

Ang insidente nahitabo sa Cabunuangan Central Elementary School nga gihimong BIU sa Cabinuangan, New Bataan, alas 12:30 sa tungang gabii, Hunyo 22, 2020.

Ang biktima giila nga si Aljay Villavicencio, 33, skilled worker ug molupyo sa New Bataan.

Si Police Captain Churchill Pablo B. Angog, Jr., Acting Chief of Police sa New Bataan Municipal Police Station, nagsaysay nga usa sa mga nagdumala sa BIU nagpahibalo kanila kabahin sa insidente.

Sa pagresponde sa mga pulis, maoy naabtan ang biktima nga nagbuy-od ug naglunang na sa kaugalingong dugo human mahiagom og mga samad dinunggaban sa ubos nga bahin sa ilok ug nawong nga miresulta sa hinanaling kamatayon.

Ang suspek nga giilang si alyas Rey, 32, taga Compostela misibat nakasibat niadtong gabhiona, apan boluntaryong mitahan sa kaugalingon sa pagka-adlaw ngadto sa Compostela Municipal Police Station ug gitunol ngadto sa New Bataan Municipal Police Station.

Matud ni Angog, Jr. nga "crime of passion" ang motibo sa krimen sanglit nahimo sa suspek ang pagpatay sa biktima tungod sa kasuko niini nga giilog ang iyang hinigugma.

Nasayran nga ang biktima nasulod sa BIU gumikan gikan kini sa Siargao ug isip protocol sa lungsod, ipaubos kini sa 14-adlaw nga quarantine.

Nilampos ang suspek sa pagpatay sa biktima pinaagi sa pag-agi niini sa likod nga bahin sa eskuwelahan kung diin tua nahimutang ang biktima.

Gihikay na sa New Bataan Municipal Police Station ang kasong pagpatay batok sa suspek.


Source: Sun.Star Superbalita (https://www.sunstar.com.ph/article/1864519/Superbalita-Davao/Balita/Nangilog-og-uyab-gitipi?ref=rss&format=simple&link=link)

No comments