Recent Posts

Breaking News

Nag-Covid nasipyat, nakauli


USA ka 40-anyos nga babaye gikan sa usa sa mga isolation center sa Dakbayan sa Davao malipayon nga gidawat sa iyang pamilya sa iyang pag-uli sa Sitio Sta. Cruz, Barangay Leon Garcia human gi-quarantine.

Sa iyang pag-uli, dala niini (pangalan gitago) ang "release order" nga gipirmahan sa usa ka giingong doktor (pangalan gitago) alas 12:35 sa udto niadtong Martes, Hunyo 30, 2020, sumala ni Barangay Leon Garcia Kapitan Lita Empis.

Apan daw langit nga mitabon sa kalipay sa pasyente ug iyang pamilya kay wa pa gani siya makasaka sa balay, nakadawat na siya og tawag gikan sa nurse sa isolation center nga pabalikon kay sayop ang dokumento nga gihatag kaniya kay positive pa siya, matud ni Empis.

Matud ni Empis, pagkadakong sayop matud pa sa doktor kay wala nagsusi sa dokumento nga iyang gipirmahan hinungdan nga nakauli ang biktima sa ilang balay.

Kon nakighangop pa siya sa iyang pamilya tungod sa kamingaw ug pagpasalamat nga luwas siya, sila tanan dad-on sa isolation center o dili sila pagawson sa ilang balay sulod sa 14 ka adlaw nga quarantine.

"Dili baya lalim sa mga opisyal sa barangay nga naga-monitor sa mga suspek aron pagseguro nga motuman sila ug dili makatakod sa uban," sulti sa kapitan.

"Akong pangutana, nganong gipaabot pa man sa alas 4 sa hapon ayha siya gikuha pagbalik nga positive man kaha siya?"

Ang insidente gi-report na ni Kapitan Empis sa Covid-19 Operation Center sa Dakbayan sa Davao, uban sa panghinaot nga unta dili na kini masubli.

"Dili lalim nga mabutang sa very high risk ang imong gidumala nga barangay," kabalaka ni Empis.

Sa daan nga record, dunay 31 ka kaso sa Leon Garcia apan duha na lang ang nabilin sa isolation center. Ang 29 pulos nag-negative ug nakapauli na.

Sa bag-ong record, dunay walo ang nadugang, duha ang nakagawas na, busa unom na lang ang nabilin sa isolation center, apil ang gibalik nga pasyente, dugang butyag ni Empis.

Wa pay gipagawas nga pahayag ang hingtungdang doktor ug mga nagdumala sa isolation center.


Source: Sun.Star Superbalita (https://www.sunstar.com.ph/article/1862077/Superbalita-Davao/Balita/Nag-Covid-nasipyat-nakauli?ref=rss&format=simple&link=link)

No comments