Recent Posts

Breaking News

Mga Pakistani midonar og tambal, vitamins sa tambalanan sa Mandaue


MIDONAR og 14 ka mga tambal ang Pakistan-Philippine (PakPhil) Friendship Association ngadto sa Mandaue City Hospital (MCH) niadtong Hulyo 13, 2020.

Matod ni Farukh Ahmad, presidente sa PakPhil-Cebu, nga ang mga donasyon nagpamatuod nga ang komunidad sa mga Pakistani nga anaa sa Sugbo andam moabag sa mga Pilipino sa pakigkumbati sa coronavirus disease (Covid-19).

Sagad sa mga tambal nga gisulod og tulo ka boxes, mao ang antibiotics, vitamins ug uban pa nga mga tambal.

Gani, ang mga tambal makatabang sab sa pagkumbate sa mga impeksyon nga dala sa Covid-19 virus ingon man sa komplikasyon nga dala sa laing mga sakit.

Ang donasyon dako nga matabang sa dakbayan sa Mandaue labi na sa mga pasyente sa Mandaue City Hospital nga way igong resources aron ikapalit og tambal, sigon ni Dr. Jake Ian Seno, acting MCH head.

Niingon si Seno nga ang antibiotics ug steriods makatabang sa pagtambal sa mga pasyenteng nagpositibo sa Covid-19 ug uban pang impeksyon.

Gawas sa dakbayan sa Mandaue, naghatag sab ang PakPhil sa dakbayan sa Lapu-Lapu ug Talisay diin nagpuyo sagad ang mga Pakistani.

Mohatag pa og face masks ang PakPhil ngadto sa mga frontliner o sa mga barangay dinhi sa Sugbo, apan sigon ni Ahmad nga nagpaabot pa sila nga maabot na ang shipment niini dihi sa Sugbo.

Sa Hulyo 13 nga talaan, ang Dakbayan sa Mandaue dunay 1,311 na ka mga kaso sa Covid-19, 856 niini mga aktibo pa.

Miabot na og 413 ang total recoveries kun nangaulian sa mao nga sakit samtang 42 ang patay. (KFD)


Source: Sun.Star Superbalita (https://www.sunstar.com.ph/article/1863565/Superbalita-Cebu/Balita/Mga-Pakistani-midonar-og-tambal-vitamins-sa-tambalanan-sa-Mandaue?ref=rss&format=simple&link=link)

No comments