Recent Posts

Breaking News

Mga kapitan nga BOPK mialma sa hinabang


NIALMA ang ubang barangay captains sa desisyon ni Cebu City Mayor Edgardo Labella nga di na mopagawas og laing hugna sa ayuda ngadto sa 80 ka mga barangay sa siyudad.

Matod ni Labella nga mo-focus ang City Hall sa paghatag og ayuda sa mga lugar nga gipaubos sa segmental lockdown.

Ang mga kaalyado nga barangay captains ni Labella uyon kay sobra na ang nahatag sa Siyudad ngadto sa kabarangayan.

Apan alang sa mga kapitan nga ubos sa Bando OsmeƱa Pundok Kauswagan (BOPK), kuwang pa ang assistance nga nahatag sa City Hall kanila kay ang mga ayuda nga gipagawas sa Siyudad wa niagi nila kay gihatag sa mayor’s information and liaison office (Milo).

Si Suba Barangay Captain Joel Sable niingon nga sakto na ang duha ka sets sa relief goods nga gipagawas sa Siyudad niadtong enhanced community quarantine (ECQ).

“Kaduha na gyud mohatag og tag 25 kilos kada pamilya, ug kaduha na sab mohatag og financial assistance ang Siyudad para gihapon sa ayuda ug sa PPE,” sigun ni Sable.

Si Sambag 2 Barangay Captain Ryan Aznar niingon nga aduna say limitasyon ang resources sa City Hall.

“Dili pud siguro ta mag-expect nga maka-sustain ang government sa paghatag og ayuda sa mga tawo. Limited ra man gud ang resources sa gobyerno, dili jud maapod sa tanan,” ingon ni Aznar.

Pero para kang Inayawan Barangay Captain Kirk Bryan Repollo, sakop sa BOPK, nga ang rice subsidy gi-release sa Siyudad kay wa niagi sa iyang opisina. Ang tabang sa Siyudad kay “far from enough,” matod niya.

Matod ni Repollo nga sukad nag-community quarantine, ang P3 million pa lang iyang nadawat gikan sa Siyudad, kon diin gigamit niya para palit og mga de lata, noodles, bihon, ug misua nga gi-distribute ngadto sa 11,000 ka mga pamilya sa ilang barangay.

Gikuhaan usab kini sa pagpalit og face masks.

Gahuwat pa sad siya sa i-release sa Siyudad nga P1 milyon.

Matod ni Repollo nga ang barangay funds ang iyang gigamit para paghatag og relief assistance sa iyang mga sakop sud sa upat sa buwan.

Gihimo kini ni Repollo human aduna gihapon siyay nadawat nga reklamo kay wa makadawat sa bugas nga gikan sa City Hall. (JJL)


Source: Sun.Star Superbalita (https://www.sunstar.com.ph/article/1864024/Superbalita-Cebu/Balita/Mga-kapitan-nga-BOPK-mialma-sa-hinabang?ref=rss&format=simple&link=link)

No comments