Recent Posts

Breaking News

Mga kalihukan sa fiesta sa Sogod kanselado


KANSELADO ang mga kalihukan sa kapistahan sa lungsod sa Sogod, amihanang Sugbo karong tuiga.

Hinuon magpadayon ang mga misa ug nobenaryo.

Mao kini ang gipahibawo ni Sogod Mayor Richard Streegan sa Hulyo 13, 2020.

Bisan kon naghinangat na ang kapistahan ug gani gipaubos na sa modified general community quarantine (MGCQ) ang lalawigan sa Sugbo, gikanselar lang una sa lungsod ang pagsaulog sa kapistahan karong tuiga.

Sa giluwat nga pamahayag sa mayor, ang iyang desisyon nagbase usab sa lagda sa Inter-Agency Task Force (IATF) nga wa usay ipahigayon nga dagkong mga kalihukan.

Kini paagi nga di mokatap ang kagaw sa coronavirus disease (Covid-19).

"Kita naninguha nga makapahigayon gayud og mahinungdanon nga selebrasyon. Apan tungod niining pandemya nga atong giatubang karon, dili nato mabutang sa dakong risgo ang atong katawhan ug mga bisita," pagpasabot sa mayor.

Subay sa naandan nga pagsaulog, matumong kini sa Hulyo 25. Mao kini ang pangilin ni St. James the Apostle.

Apan sa nauyonan sa Fiesta Executive Committee sa lungsod nga kinahanglan nila kining kanselahon tungod sa risgo nga atubangon sa katawhan.

Hinuon gipahibawo ni Streegan nga sanglit gitugot naman ang pagpahigayon og misa, ipadayon gihapon ang misa-nobenaryo ug misa atol na sa kapistahan.

"Manghinaot ako kauban sa mga opisyales dinhi sa atong lungsod sa inyong pagsabot ug sa makanunayong pagsuporta sa atong mga lakang aron masiguro nga luwas ug malambuon ang katilingban," dugang sa mayor.

Apan ang makaapil sa misa limitado lang, tungod kay kutob sa 50 porsyento ang kapasidad nga makasulod sa simbahan.

Matag barangay mahimo usab nga mopadala og respresentative, apan usa lang ka sakyanan ang makauban sa motorcade.

Kinahanglan usab nga di molapas sa upat ngadto sa lima ka pasahero ang pasakyon sa sakyanan. Ang dili makatambong giawhag sa pagtan-aw sa livestreaming sa lungsod.

Gipahinumdoman sa kagamhanan ang mga konstituente sa estriktong pagsubay sa health protocol sa lungsod aron malikay sa bisan unsa nga sakit ilabi na sa Covid-19.

Ang lungsod sa Sogod nakatala na og siyam ka mga positibong kaso sa Covid sa Hulyo 12, unom ang aktibo samtang tulo na ang naka-recover sa sakit. (ANV)


Source: Sun.Star Superbalita (https://www.sunstar.com.ph/article/1863365/Superbalita-Cebu/Balita/Mga-kalihukan-sa-fiesta-sa-Sogod-kanselado?ref=rss&format=simple&link=link)

No comments