Recent Posts

Breaking News

Mga biktima sa Kapa giawhag sa SEC; CIDG 7 nalipay nga founder nadakpan


GITAMBAGAN sa Securities and Exchange Commission (SEC) ang mga biktima sa Kapa-Community Ministry International, Inc. (Kapa) sa pagpangita og laing legal nga pamaagi sa pagkuha og balik sa ilang kuwarta.

Si Atty. Oliver O. Leonardo, assistant director sa Enforcement and Investor Protection Department sa SEC, niingon nga ilang kanunay nga giawhag ang publiko nga mopadayon sa pagpasaka og mga kaso aron pagpalig-on sa kasong kriminal nga gipasaka sa Kapa ug iyang founders.

“Separate yung filing for the recovery of your investment. You can file this pursuant to a particular section of the Securities Regulation Code. If you have suffered from any violation committed by these people representing Kapa, you can do so,” matod ni Bernabe sa SunStar Cebu.

“Pwede rin kayong mag file ng case for estafa as well as breach of contract of the agreement. Pwede ninyong i-explore yung ganong mga possibilities,” dason niya.

Matod ni Leonardo, ang mga husay sa kaso batok sa Kapa ug iyang founders magpadayon human nasikop si Kapa Founder Joel Apolinario, kinsa nagtago sulod sa pipila ka buwan.

Si Apolinario uban sa laing 23 ka mga kauban nasikop sa hilit nga resort sa Lingig, Surigao del Sur niadtong Martes, Hulyo 21, 2020 human sa lia ka buwan nga gipangita sa korte tungod sa reklamo nga investment scam.

Usa ka taho gikan sa Caraga Police Regional Office (CPRO) nagkanayon nga ang kapulisan nga nagsilbi sa arrest ug search warrants batok kang Apolinario sa alas 7:30 sa buntag sa naasoy nga adlaw dihang ang iyang mga sakop nakig-engkuwentro sa awtoridad.

Duha ka mga wal mailhing lalake ang namatay ug usa ka Melecio Siano samdan.

Si Leonardo nagkanayon nga ang arrest warrant sa kapulisan alang kang Apolinario giluwatan sa Regional Trial Court in Cagayan de Oro City sa kasong syndicated estafa.

Sa pagkakaron, dason ni Bernabe, nagpaabot sila sa kalamboan gikan sa mga korte, samtang dili pa moisyu sa notice of hearing bahin sa mga kaso sa Kapa sa ilang buhatan.

Hinuon, dason niya, ang kalangay sa kalamboan sa kaso tungod sa Covid-19 pandemic.

Ang Department of Justice (DOJ) niadtong Enero 2020 pormal nang nipasaka og kasong kriminal sa Kapa lakip sa iyang mga opisyal ug promoters.

Si Leonardo nagkanayon nga ang DOJ, base sa inpormasyon nga gipasaka sa Bislig City Regional Trial Court Branch 29, niingon nga ang Kapa “willfully, unlawfully and criminally” nalambigit sa pagpamaligya o pag-apud-apod sa securities sa publiko nga walay registration statement nga gipasaka ug walay naaprobar sa SEC.

Ang DOJ, niadtong Septiyembre 2019, unang nirekomendar sa kasong kriminal batok sa Kapa ug iyang mga opisyal human nakakita og probable cause ug liability batok sa Kapa sa kalapasan sa Securities Regulation Code.

Si Leonardo nagkanayon nga ang DOJ nitumbok sa kaso batok sa Kapa founder ug president Joel Apolinario, trustee Margie Danao ug corporate secretary Reyna Apolinario sa paglapas sa Sections 8(8.1), 26.1 ug 28 sa Republic Act 8799, o ang Securities Regulation Code (SRC).

Samang kaso ang gipasaka batok nila ni Marisol Diaz, Adelfa Fernandico, Moises Mopia ug and Reniones Catubig.

Ang DOJ nikiha usab kang Diaz sa Rizal Regional Trial Court sa kalapasan sa Section 28, samtang samang kaso batok nila ni Mopia ug Fernandico sa Quezon City Regional Trial Court Branch 93.

Usa ka arrest warrant batok ni Fernandico ang giluwatan sa Quezon City Regional Trial Court niadtong Disyembre 2, 2019, dugang ni Leonardo.

Samtang, ang Criminal Investigation and Detection Group (CIDG) 7 nalipay sa pagkasikop sa founder sa Kapa.

Si Police Major Ronald Alan Tolosa, deputy chief sa CIDG 7, nga si Apolinario daghan nga kaso ang giatubang dinhi sa Central Visayas (CV) ug tungod sa pagkasikop niini, matubag na unya ang gipangayong hustisya sa mga nabiktima sa scam.

“Masugdan na ang hearing or unsa man ang proceedings para ma-settle o matagaan og pinakadako gyud ani ang hustisya especially kato sa mga nabiktima,” matod ni Tolosa.

“Aduna pa may mga existing complainants gihapon. So mas posible gihapon nga mogawas gihapon ni ang iyang series of warrants,” dugang ni Tolosa.

Sa monitoring sa CIDG-7, wala na mobalik sa ilang operasyon Kapa dinhi sa Central Visayas. (WBS, AYB)


Source: Sun.Star Superbalita (https://www.sunstar.com.ph/article/1864434/Superbalita-Cebu/Balita/Mga-biktima-sa-Kapa-giawhag-sa-SEC-CIDG-7-nalipay-nga-founder-nadakpan?ref=rss&format=simple&link=link)

No comments