Recent Posts

Breaking News

Mekaniko gituohang gitulis, gipatay


MEKANIKO nga gituohang gitulis napalgang patay sa usa ka quarry sa alas 6 sa buntag sa Miyerkulis, Hulyo 15 sa Sitio Lasgas, Upper Tanay, Barangay Pulangbato, Dakbayan sa Sugbo.

Si Juanito Rabadon Bontilao 31, ulitawo, mekaniko sa usa ka auto dealer sa Dakbayan sa Mandaue, taga Barangay Pung-ol Sibugay, Dakbayan sa Sugbu, dunay tulo ka mga samad pinusilan sa lawas.

Si Police Major Jonathan Taneo, hepe sa Talamban Police Station nga nahinabi sa Superbalita Cebu, nagkanayon nga daghang anggulo ang ilang gisubay. Usa niini ang tulis kay wa na makit-i ang importanting mga butang ug gamit ni Bontilao, kwarta, identification (ID) card ug uban pa, gawas lang sa iyang motorsiklo nga naa gihapon sa dapit.

Sumala pa ni Taneo nga posibling giatangan sa killer si Bontilao unya gitulis ug posibling misukol mao napusilan.

Ang ikaduhag anggulo ang love triangle.

Susihon pa sa kapulisan ang impormasyon nga dunay hinigugma si Bontilao kaniadto ug nagkabuwag na sila.

Si Taneo nikompirmar nga ang maong dapit tagbuanan sa mga manag-uyab.

Matod niya nga si Bontilao giila sa iyang inahan, igsuon ug uyoan dihang ilang gisusi ang dapit human nakadungog og report nga dunay nakit-ang lawas sa usa ka tawo.

Si Taneo niingon nga ang mga kabanay ni Bontilao nibutyag nga niadtong Martes sa hapon milakaw ang biktima.

Nananghid nga mopalit siyag karburador sa ilang multicab apan wala na mobalik.

Nakugang na lang sila kagahapon sa buntag nga nakit-an ang lawas niini.

Si Taneo nidugang nga ang mga residente sa lugar mibutyag mga alas 12 na pasado sa kaadlawon sa Miyerkules nakadungog silag upat ka mga buto sa armas.

Giingong human sa buto, dunay sports utility vehicle (SUV) nga miagi sa dapit, ingon man motorsiklo.

Apan di pa sila makaingon kon mao bay gisakyan sa mga killer sanglit ang maong dapit daghan sab og mangaging sakyanan kay mo short cut sa ilang pagbiyahe padulong sa bukid. (GPL)


Source: Sun.Star Superbalita (https://www.sunstar.com.ph/article/1863649/Superbalita-Cebu/Balita/Mekaniko-gituohang-gitulis-gipatay?ref=rss&format=simple&link=link)

No comments