Recent Posts

Breaking News

Medellin mayor way Covid


NAGNEGATIBO sa coronavirus si Medellin Mayor Joven Mondigo human mipaubos sa reverse transcription polymerase chain reaction (RT-PCR) test, pahibawo mismo sa mayor Hulyo 9, 2020.

Si Mondigo mipaubos sa pagsulay kauban sa iyang mga staff sa munisipyo human nagpositibo sa coronavirus ang usa sa ilang mga kawani.

Nimando si Mondigo sa temporaryong pagpasuspenso sa operasyon sa munisipyo aron ipahigayon ang pag-disinfect sa edipisyo ug sa tupad nga mga ahensya.

"Mapasalamaton kita sa Ginuo sa paghatag niining lain nga higayon aron makapadayon kita sa pag serbisyo sa katawhan sa Medellin," matod ni Mondigo.

Apan bisan pa sa maayong balita, gipahibawo sa mayor nga nakatala og tulo ka mga bag-ong positibo nga kaso sa Covid ang lungsod.

Ang usa kanila mao ang frontliner nga taga Purok Sunflower, Barangay Lamintak.

Anaa siya na-assign sa laing lungsod ug uwahing nakauli ang pasyente sa Hulyo 4.

Nisunod sa listahan ang 45 anyos nga taga Barangay Don Virgilio Gonzales.

Siya ang asawa sa ika-unom nga pasyente nga nag positibo sa Covid sa lungsod.

Samtang ang ikatulo mao ang 46 anyos nga lalake nga taga Sitio Boongon, Barangay Maharuhay.

Nag positibo siya human nga nakahimamat sa ika limang pasyente sa lungsod.

Tungod niini, gimando sa mayor ang hinanali nga pagpahigayon og contact tracing ingon man ang pag isolate sa mga nagpositibo sa sakit.

Sa kinatibuk-an, nakatala na og siyam ka mga positibong kaso ang lungsod.

Tungod niini, giawhag sa mayor ang iyang mga konstituente sa kooperasyon ug estriktong pagtuman sa mga health protocol aron malikayan ang pagtakboy sa sakit.

"Nanghinaut kita nga hugot nga tumanon sa tanan ang mga lagda sa paglikay sa sakit. Ug doblehon nato ang pag-ampo nga dili na mokatap pa ang Covid-1 sa atong lungsod," matod sa mayor. (ANV)


Source: Sun.Star Superbalita (https://www.sunstar.com.ph/article/1862989/Superbalita-Cebu/Balita/Medellin-mayor-way-Covid?ref=rss&format=simple&link=link)

No comments