Recent Posts

Breaking News

Mayor Sara: House lockdown sa Barangay 23-C magpadayon gihapon


BISAN pa kon gitanggal na ang hard lockdown nga giimposar sa tibuok Barangay 23-C ning siyudad sa Davao, magpadayon gihapon ang pagpatuman sa purok o house lockdown nga ideterminar sa mga doktor sa maong barangay.

Kini mismo ang gitug-an ni Mayor Sara Duterte-Carpio Lunes, Hulyo 20, 2020, atol sa programa sa 87.5 FM DcDR.

Gitanggal ang pag-imposar sa hard lockdown sa nahisgutang barangay alas 12 sa udto Lunes.

Apan gitin-aw sa mayor nga bisan pa niini naa pa gihapon ang pag-lockdown sa purok o balay kung masayran nga duna pay positibo sa sakit.

Human sa serye nga paglusad og reverse transcription-polymerase chain reaction (RT-PCR) tests sa coronavirus disease (Covid-19) gikan Hulyo Hulyo 15 hangtud Hulyo 17, 2020 sa pito ka mga purok sa nahisgutang barangay, gisugyot nga human sa duha ka semana nga enhanced community quarantine (ECQ), ipaubos na lang kini ngadto sa mga purok o house lockdown, ilabi na kadtong dapit nga dunay positibo nga kaso sa sakit.

Apan istrikto pa gihapong iimposar ang security ug health protocols sa purok ug house lockdown.

Mga maapektuhan nga mga molupyo, pagadad-an gihapon og pagkaon ug uban pang mga batakang panginahanglan.

Gihimo ang maong lakang aron nga mapugngan ang halapad unya nga pagkuyanap sa makamatay nga sakit sulod ug gawas sa lugar tungod sa nakompirmang positibong mga kaso. (WGM)


Source: Sun.Star Superbalita (https://www.sunstar.com.ph/article/1864146/Superbalita-Davao/Balita/Mayor-Sara-House-lockdown-sa-Barangay-23-C-magpadayon-gihapon?ref=rss&format=simple&link=link)

No comments