Recent Posts

Breaking News

Manuroy sa tourist destinations sikupon


MATANAO, Davao del Sur -- Nagbahad ang Matanao Municipal Police Station nga panakpon ug mag-atubang og silot ang bisan kinsang mosuory sa mga tourist destinations sa lungsod.

Subay sa mando ni Mayor Vincent Fernandez ngadto sa kapulisan nga wala gitugtan ang matag indibiduwal nga mosuroy sa ilang dapit.

Nasayran nga sagad ginadayo ang Mal River sa lungsod nga daw mora'g pista matag adlaw kay bisan taga laing lugar mangabot sa sapa aron maligo.

Apil sa ginadagsa sa mga tawo ang Rock Formation Falls sa Barangay Colonsabac nga una nang gipahibawo sa lokal nga gobyerno nga temporaryong pasirad-an.

Pipila sab ang naga-selfie sa Talambato-Anbang Falls ug Barak Falls sa samang barangay.

Ang uban nikatkat sab sa Mountain Top sa Sitio Lahak sa Barangay Asbang sanglit makita ang nindot nga talan-awon sa kabukiran, ilabi na ang ubos nga bahin.

Apan sa opisyal Facebook page sa kapulisan sa Matanao MPS, gipahibawo nila ang publiko nga adunay gipaguwang executive order ang buhatan sa mayor kalabot sa maong mando.

Atubangon sa bisan kinsa nga mosupak ang mga silot nga nahisubay sa balaod kontra coronavirus disease 2019 (Covid-19).

Samtang daghan sab ang nagadayo gikan sa nagkadaiyang lugar sa Holy Land sa Sitio Neptune ug Tinago Falls sa Sitio Balagon, pulos sakop sa Barangay Managa sa Bansalan sa mao gihapong probinsiya diin magtapok ang daghang grupo nga way face mask. (Orlando B. Dinoy)


Source: Sun.Star Superbalita (https://www.sunstar.com.ph/article/1862870/Superbalita-Davao/Balita/Manuroy-sa-tourist-destinations-sikupon?ref=rss&format=simple&link=link)

No comments