Recent Posts

Breaking News

Mandaue City mi-decontaminate sa mga tunghaan


ANG Mandaue City Disaster Risk Reduction Management Office (CDRRMO) nagsugod sa pag-decontaminate sa mga eskuylahan nga gigamit isip barangay isolation units (BIU) niadtong Miyerkules, Hulyo 29, 2020.

Giabisohan sa Department of Education (DepEd) ang tanang local government units (LGUs), nga gigamit ang ilang mga lokal nga publikong mga tunghaan isip Covid-19 isolation centers, gikan sa mga eskwelahan hangtod sa Hulyo 30, 2020.

Gikan sa siyam ka publiko nga tunghaan sa Mandaue City nga gigamit isip isolation centers, adunay tulo ka mga eskwelahan nga magpabilin nga gamiton sa dakbayan bisan human sa Hulyo 30, matod ni John Eddu Ibañez, ang executive secretary sa Mandaue City Mayor Jonas Cortes.

Matod ni Ibañez, nitugot ang DepEd-Mandaue aron gamiton ang tulo ka mga eskuylahan isip isolation center.

Ang tulo ka mga eskuylahan gi-cluster, ang usa alang sa amihanang bahin sa Mandaue, ang usa alang sa habagatang bahin sa Mandaue ug ang Mandaue City Central School o gitawag usab nga Mandaue City Central Isolation Unit.

Ang unom ka laing mga eskwelahan nga gigamit isip isolation center sugdan na sa pag-decontaminate sa CDRRMO aron maandam kini alang sa pagbukas sa klase sa Agusto 24, 2020.

Gani duha ka mga eskuylahan sa syudad sa Mandaue, gikan sa Barangay Casili ug Barangay Tawason gi-decontaminate na sa mga kawani sa CDRRMO niadtong Hulyo 29.

Si Felix Suico, ang hepe sa operasyon sa CDRRMO, niingon nga ang ilang malimpyohan nga mga eskuylahan ang mga wala nay gi-admit nga pasyente nga positibo sa Covid-19.

Matod niya nga niadtong Hulyo 30, ang mga eskuylahan sab sa Barangay Canduman, Barangay Cubacub ug Barangay Pagsabungan gipang-decontaminate. (KFD)


Source: Sun.Star Superbalita (https://www.sunstar.com.ph/article/1865371/Superbalita-Cebu/Balita/Mandaue-City-mi-decontaminate-sa-mga-tunghaan?ref=rss&format=simple&link=link)

No comments