Recent Posts

Breaking News

Maestra, kapuyo dakpan sa buy-bust


NASIKOP sa mga sakop sa Mactan Police Station sa Lapu-Lapu City Police Office (LCPO) ang usa ka maestra sa Sityo Mahayay, Barangay Bankal, Dakbayan sa Lapu-Lapu, pasado alas 5 sa kaadlawon sa Miyerkules, Hulyo 8, 2020.

Lakip sa nasikop mao ang iyang kapuyo nga kunsabo niya sa giingong pagpamaligyag illegal drugs.

Ang maestra nailhang si Lea Mae Sinugbojan Dajao, 22, lumolupyo sa Barangay Buaya, Dakbayan sa Lapu-Lapu.

Giingong si Dajao magtutudlo sa usa ka pribadong tunghaan sa Dakbayan sa Sugbo ug nalakip sa watchlist sa LCPO.

Ubang nasikop kang Dajao ang iyang live-in partner nga nailhang si Elymar Matidios Ravi, 28.

Matod ni LCPO Director Police Colonel Clarito Baja nga ang mag live-in partner gipaubos nila sa surveillance sulod sa duha ka mga semana human makadawat og taho sa ilang ilegal nga kalihukan.

Di pa makatumbok si Baja unsa kadako ang operasyon sa mga suspek sanglit ila pang subayon kon kinsa ug diin sila magkuhaan og supply.

Apan giklaro sa director nga gawas sa Dakbayan sa Lapu-Lapu ang supplier.

Nakuha gikan kanila ni Dajao ug Ravi ang 36 ka pakete sa gituohang shabu, 12 niini ang subject sa buy-bust ug 24 ka tag P1,000 nga budol money nga maoy gigamit sa kapulisan sa pagpalit.

Gibana-banang moabot og 101.2 gramos ang gibug-aton sa nakuhang shabu gikan sa mga suspek nga mobalor og P688,160 base sa Dangerous Drugs Board (DDB) value. (GCM)


Source: Sun.Star Superbalita (https://www.sunstar.com.ph/article/1862928/Superbalita-Cebu/Balita/Maestra-kapuyo-dakpan-sa-buy-bust?ref=rss&format=simple&link=link)

No comments