Recent Posts

Breaking News

‘Lugos’ sa anak nabuko tungod sa reklamo sa mama


PAGREKLAMO usa ka babaye sa pagpangulata sa iyang bana kaniya maoy nakabutyag sa pagpangbuso sa amahan ngadto sa ilang dalagitang anak.

Tungod niini, duha ka mga kaso ang gipasaka sa kapulisan batok sa amahan nga gidakop nila ni Police Captain Janelito Marquez sa Guadalupe Police Station sa Cebu City gabii sa Hulyo 21, 2020.

Si Erick (di tinuod nga ngan), 44, gidakop sa mga pulis sa Guadalupe human nangayo og pakitabang ang asawa tungod sa pagpangulata.

Si Jane (di tinuod nga ngan) nisumbong kanila ni Marquez nga di na niya maagwanta ang pagpangulata sa iyang bana kaniya.

Dihang nadala na sa Guadalupe Police Station dala ang ilang dalagitang anak, nibutyag ang 14-anyos nga giunay sa paglugos sa iyang amahan.

“Nisumbong ang bata sa akong WCPD (Women and Children Protection Desk) nga imbestigador ug mitug-an ang bata nga nahilabtan gyud sa iyang amahan daw,” butyag ni Marquez sa Superbalita Cebu.

Dugang ni Marquez nga ang insidente nahitabo sa miagi pa nga semana.

Ang 44 anyos nga suspek mag-atubang og kaso sa pagkulata sa iyang sa asawa nga kalapasan sa Republic Act (RA 9262) kun Anti-Violence Against Women and their Children Act of 2004 ug kalapasan sa Republic Act 7610 kun Special Protection of Children Against Abuse, Exploitation and Discrimination Act.

Si Erick anaa na karon sa Cebu City Police Office detention cell samtang giandam ang kasong ipasaka batok kaniya. (BBT)


Source: Sun.Star Superbalita (https://www.sunstar.com.ph/article/1864428/Superbalita-Cebu/Balita/Lugos-sa-anak-nabuko-tungod-sa-reklamo-sa-mama?ref=rss&format=simple&link=link)

No comments