Recent Posts

Breaking News

LSIs, ROFs nakatampo sa taas nga kaso sa Covid-19


ANG pagpangabot sa locally stranded individuals (LSIs) ug ang pagbalik sa overseas Filipinos (ROF) posibleng nakatampo sa pagsulbong sa ihapo sa kaso sa coronavirus disease 2019 (Covid-19) sa Davao Region.

Kini base sa datus gikan sa Department of Health (DOH) sa Davao Region.

Sukad Hulyo 13, ang Davao Region nitala og kinatibuk-ang 733 ka kaso ug 205 o 26.5 porsiyento niini mga LSIs ug ROFs.

Ang taas nga ihap sa Covid-19 cases sa mga probinsiya mao ang mga trabahante gikan sa Manila ug Cebu kinsa niuli ngadto sa ilang mga pamilya.

Ang Davao de Oro duna nay 55 Covid-19 positive individuals apan 46 kanila mga LSIs ug ROFs.

Duna say samang kahimtang ang Davao Oriental, kon diin 35 sa 48 sa nakompirmang kaso sa Covid-19 mga nanguli nga molupyo.

Sa Davao del Norte, 56 sa 75 kinatibuk-ang mga kaso mga LSIs ug ROFs, samtang halos katunga o 10 sa 29 sa Covid-19 positive cases sa Davao del Sur mao gihapon mga nanguli nga mga molupyo.

Samtang ang Davao City, nitala og gamay nga Covid-19 positive LSIs ug ROFs nga 58 sa 562 nga kinatibuk-ang Covid-19 cases.

Sa paghinabi sa radyo niadtong Lunes, Hulyo 13, gibutyag ni Davao City Mayor Sara Duterte-Carpio nga ang dakbayan nitala og pinakadaghan nga Covid-19 active cases nga niabot og 162 nga giingong tungod sa padayong pag-abot sa mga LSIs ug ROFs.

Matud niya nga nisusi sila og 166 nga mga niuli nga residente ug 15 kanila nasayrang positibo sa Sars-Cov-2, ang kagaw nga maoy hinungdan sa Covid-19. (Roberto A. Gumba Jr.)


Source: Sun.Star Superbalita (https://www.sunstar.com.ph/article/1863490/Superbalita-Davao/Balita/LSIs-ROFs-nakatampo-sa-taas-nga-kaso-sa-Covid-19?ref=rss&format=simple&link=link)

No comments