Recent Posts

Breaking News

Liloan nagskedyul sa pagpangompra


ARON mapugngan ang pagsaka sa kaso sa mga nagpositibo sa coronavirus disease (Covid-19) sa lungsod sa Liloan, Cebu, niluwat si Mayor Christina Garcia-Frasco og kamandoan nga nag-regulate sa operasyon sa mga merkado ug supermarkets sa lungsod.

Kini bisan pa og nalakip na ang lungsod sa gipaubos sa modified general community 1uarantine (MGCQ).

Ang Executive Order (EO) 2020-12 naglatid sa mga adlaw nga mahimong maka- abli ang mga pampubliko ug pribadong merkado ingon man ang mga health ug safety protocol nga kinahanglang tumanon.

Alang sa merkado sa Barangay Yati ug Capulay ug sa Barangay Tayud sirado kini matag Lunes alang sa ipahigayon nga disinfection. Sa Martes sirado usab ang merkado sa Barangay Bajac sa Poblacion.

Samtang ang merkado sa Panphil B. Frasco sa Barangay Jubay, kinahanglan usab nga manira matag Huwebes.

Ang tanan nga pampubliko o pribadong merkado manira na sa alas 6:00 sa hapon, samtang sa 7:00 usab sa gabii manira ang mga supermarkets ug malls.

Gimandoan ang tanan nga mga indibidwal sa lungsod sa pagdala sa quarantine pass ug pag sul-ob mask ilabi na kon mosulod sa merkado, mall ug supermarket.

Kinahanglan usab nga walay mahitabo nga hand-to-hand contact sa tindera ug kustomer diin ang bayad ingon man ang sukli kinahanglang isulod sa sudlanan aron mao lang kini ang kuptan. Paagi nga malikayan ang pagtakod sa virus.

Subay sab sa maong kamandoan, kinahanglan nga ang tanang tinda ilabi na ang mga pagkaon duna kini mga tabon o takob.

Lakip usab niini ang pag butang ug mga hand sanitizers o disinfectant aron nga maka disinfect ang mga kustomer human sa pagpamalit.

Gawas sa mga regulasyon sa merkado, gipahibaw usab sa lungsod nga suspendido ang number coding sa mga sakyanan ug motorsiklo nga moagi sa mga kadalanan sa lungsod.

Kining tanan nga mga kamandoan, epektibo karong adlawa, Hulyo 15, 2020. Sa kadtong magmagahi sa pagtuman ipaubos sa walo ka oras nga community service sa lungsod.

Alang sab sa mga tindahan nga di mo subay sa lagda, mahimo nga i-revoke ang business permit nga mosangpot unya sa pagkasira sa ilang negosyo.

Base sa datos sa lungsod sa Hulyo 13, moabot na sa 84 ka mga positibong kaso sa covid ang natala, 33 na ang nakarecover ug napulo na ang namatay.

“Bisan unsa pa kadaghan ang mga regulasyon na atong gi-implementar sa gobyerno alang sa pag protiher sa katilingban, kung kita mismo dili mosunod ug wala’y disiplina sa kaugalingon, kanunay na mabutang sa peligro ang atong kinabuhi ug kinabuhi sa atong pamilya”, matod ni Frasco. (ANV)


Source: Sun.Star Superbalita (https://www.sunstar.com.ph/article/1863566/Superbalita-Cebu/Balita/Liloan-nagskedyul-sa-pagpangompra?ref=rss&format=simple&link=link)

No comments