Recent Posts

Breaking News

Lapu nangay’g donasyon sa dugo


SA TUYO nga matubag ang panginahanglanon nga plasma ug dugo, ang kagamhanan sa dakbayan sa Lapu-Lapu mopahigayon og blood donation drive karong Huwebes, Hulyo 16, 2020

Ipahigayon kini sa Hoops Dome sa Barangay Gun-ob sugod sa alas 9 sa buntag hangtod sa alas 3 sa hapon.

Nasayran sa kagamhanan nga daghan ang nanginhganglan og dugo karong panahona nga mga pasyente sa coronavirus disease 2019 (Covid-19) ug alang sa pasyente sa dengue fever nga sa talaan sa dakbayan misaka usab.

Si Lapu-Lapu City Mayor Junard Chan modonar sa iyang plasma isip Covid-19 survivor.

Nasuta nga ang plasma nga gikan sa mga naayo sa Covid-19 dunay igong antibodies nga makatabang batok sa naasoy nga virus, sumala pa sa mayor.

Giawhag usab ni Chan ang ubang Covid-19 survivors sa pagdonar usab sa naasoyng kalihukan alang sa mga kaayohan sa tanang mga Oponganong manginahanglan sa dugo ug plasma.

Gibutyag ni Chan nga ang mga Covid-19 survivor nga gusto modonar ug dugo kinahanglan nagpangedaron ug 18-anyos hangtod sa 65-anyos ug motimbang og sobra sa 50 kilograms.

Kinahanglan usab kini nga negatibo na sa naasoyng virus ug sulod sa 14 ka adlaw nga walay sintomas.

Ang babayeng mga Covid-19 survivor nga ganahan modonar sa ilang dugo kinahanglan nga wala pa makaagi ug pagmabdos ug makadonar ug dugo sukad.

Estriktong health protocol ang ipatuman sa kagamhanan atol sa kalihukan sama sa pagsul-ob og face mask ug pag-obserbar sa physical o social distancing.

Ang kalihukan nahimong posible sa pakigtambayayong sa Department of Health (DOH) 7, Office of the Presidential Assistance for the Visayas OPAV ug Philippine Red Cross.

“Atong ipakita ang atong pagkamatinabangon taliwala sa pandemia, be a hero, donate blood, save lives,” matod pa ni Chan. (GCM)


Source: Sun.Star Superbalita (https://www.sunstar.com.ph/article/1863397/Superbalita-Cebu/Balita/Lapu-nangayg-donasyon-sa-dugo?ref=rss&format=simple&link=link)

No comments