Recent Posts

Breaking News

Lapu-Lapu City Hall misirado kagahapon, abli na karon


LUNES, Hulyo 6, ang Lapu-Lapu City Hall wala una modawat og mga transaksiyon subay sa mando ni Mayor Junard Chan.

Gihimo ang disinfection sa mga lugar ug buhatan sa City Hall nga sagad hugopan sa mga tawo sa tuyo nga kalikayan ang pagkatap sa coronavirus disease 2019 (Covid-19). Gipatrabaho ra gihapon ang mga empleyado ug wala kini mohimo sa ilang naandang gimbuhaton, apan nanglimpyo sa ilang tagsatagsa ka buhatan.

Matag buhatan, ang ilang mga empleyado mao ang nag-disinfect ug nag-santize sa ilang mga trabahoan sama sa lamesa, desk ug uban pa nga sagad hikapon matag karon ug unya sa katawhan ug mga empleyado.

Ang City Disaster Risk Reduction and Management Office (DRRMO) bugtong komon nga dapit lang ang ilang gi-disinfect sama sa lobby, hagdanan ug uban pa.

Ang matag buhatan gitagaan og pagtugot ni Chan nga mopalit sa ilang gigamit nga bleach ug kahimanan sa paglimpyo sama sa spayer, trapo ug uban pa. Tag duha ka kutsarita sa matag litro sa tubig ang bleach nga gigamit sa mga empleyado paglimpyo sa ilang mga work station.

Ug karon, Martes, Hulyo 7, mobalik na ang normal nga operasyon sa City Hall.

Upat ka mga dagkong opisyal sa kagamhanan ang nataptan sa Covid-19 nga naglakip ni Chan, City Social Welfare Officer Annabeth Cuizon ug Konsehal Rico Amores ug Janvi Dela Serna.

Silang tanan pulos na nakrekober hinuon gawas ni Dela Serna nga kasamtangang anaa pa sa home isolation.

Moabot na usab sobra 800 ang kaso sa Covid-19 nga natala sa dakbayan. (GCM)


Source: Sun.Star Superbalita (https://www.sunstar.com.ph/article/1862652/Superbalita-Cebu/Balita/Lapu-Lapu-City-Hall-misirado-kagahapon-abli-na-karon?ref=rss&format=simple&link=link)

No comments