Recent Posts

Breaking News

Langyaw usa sa 2 ka bag-ong gi-Covid sa Dalaguete


PULOS mga pasyente nga nakasinati og simtomas sa coronavirus disease (Covid-29) ang duha ka bag-ong mga kaso sa lungsod sa Dalaguete sa Hulyo 3, 2020, pahibawo ni Dalaguete Mayor Jeffrey Belciña.

Usa ka 52 anyos nga lalakeng langyaw ang unang pasyente sa lungsod nga nagpuyo sa sityo Solong-on, Barangay Tapon.

Siya gikuhaan og swab sample sa Hunyo 30 ug positibo ang resulta.

Ang ikaduhang pasyente mao ang 50 anyos nga lalake nga taga Sitio Labangon, Barangay Poblacion.

Anaa siya nagtrabaho sa lungsod sa Alcoy, kon diin gituohan nga iyang nakuha ang kagaw kay nagpositibo sa Covid-19 ang iyang kauban.

Gipaubos usab siya sa swab test sa Hunyo 30 ug positibo ang resulta.

Gipahibawo ni Belciña nga gipaubos na sa isolation ang mga pasyente ug gisugdan na sa lungsod ang pagsusi sa mga tawo nga ilang nakahimamat.

Ang lungsod sa Dalaguete aduna nay 10 ka mga positibong kaso sa Covid.

Nanawagan ang mayor nga maglikay nga mataptan sa bisan unsa nga sakit aron dili na modaghan pa ang kaso sa lungsod.

"Padayon kita sa pag amping karong panahona nga nagkataas ang kaso sa mga nagpositibo sa Covid-19," matod ni Belciña. (ANV)


Source: Sun.Star Superbalita (https://www.sunstar.com.ph/article/1862350/Superbalita-Cebu/Balita/Langyaw-usa-sa-2-ka-bag-ong-gi-Covid-sa-Dalaguete?ref=rss&format=simple&link=link)

No comments