Recent Posts

Breaking News

Langob, gideklarang 'world class'


MAGSAYSAY, Davao del Sur -- Gilantaw sa lokal nga gobyerno nga mahimong usa sa mga destinasyon sa turismo ang usa ka langob sa ilang lugar human gideklara kining "world class" sa Department of Environment and Natural Resources (DENR).

Ang Stafungsol Cave nga nahimutang sa Sitio Blasan sa Barangay Malawanit giila sa lokal nga DENR nga "one-of-a-kind" nga langob tungod sa nindot niining porma sa mga bato ug mga talan-awon nga haum sa ilang pagpalambo sa turismo.

Gibutyag ni Mayor Arthur Davin nga nahuman na ang assessment ug survey sa maong ahensiya ug aduna kini rekomendasyon alang sa paghimo og Cave Management Plan.

Ang mga molupyo sa lugar maoy usa sa mga makabenepisyo kung hingpit na kining abrihan sa publiko.

Sa wa pa mahitabo ang sagunsong linog sa miaging tuig, pipila na ka mga adventure seekers ang midayo sa Stafungsol Cave.

Apan sumala sa mayor nga nakita nilang lig-on ang porma sa mga bato ug mga yuta nga nakapalibot sa langob hinungdan nga angayan na kining ma-develop.

Sa kasamtangan, gisugdan na sa lokal nga gobyerno ang clearing operation aron mahimong modawat og mga turista ang lugar. (Orlando B. Dinoy)


Source: Sun.Star Superbalita (https://www.sunstar.com.ph/article/1865347/Superbalita-Davao/Balita/Langob-gideklarang-world-class?ref=rss&format=simple&link=link)

No comments