Recent Posts

Breaking News

Lamaw, gitumbok nga hinungdan sa pagkatag sa ASF


KIDAPAWAN CITY -- Lamaw ang gituohang hinungdan sa pagkuyanap sa African Swine Fever (ASF) sa probinsiya sa North Cotabato.

Kini mismo ang gikanayon ni North Cotabato Provincial Veterinary Officer Dr. Rufino Sorupia.

Gikan sa processed meat nga chorizo ang hinungdan sa pakatag sa sakit sa lungsod sa Magpet.

Nasayran nga dunay namaligya og chorizo sa mga barangay sa Ilian, Magkaalam ug mga kasikbit nga lugar. Sa dihang giluto na sa mga nakapalit, giingong baho-baho na hinungdan nga gilabay sa lamaw ug gipakaon sa mga binuhi nga baboy.

Wala sab mamatikdi ang pagsulod sa processed foods sa Magpet gumikan gi-order kini online ug gipadala sa mga forwarders.

Gidugang ni Sorupia nga moabot sa 119 ka baboy sa Magpet ang gisunog ug gilubong aron dili na mokuyanap pa sa daghang mga lugar ang kagaw.

Sa pagsuwat ning balita, ubang mga dapit sa North Cotabato, lakip na ang Kidapawan City, dili na pasudlan og mga buhing baboy ug processed meat aron mapugngan ang pagkatag sa ASF. (Edgar E. Fuerzas)


Source: Sun.Star Superbalita (https://www.sunstar.com.ph/article/1863612/Superbalita-Davao/Balita/Lamaw-gitumbok-nga-hinungdan-sa-pagkatag-sa-ASF?ref=rss&format=simple&link=link)

No comments