Recent Posts

Breaking News

Labella nagtinguhang mohatag og P30K sa medical workers


ANG Cebu City Government mohatag og tag P10,000 matag buwan sulod sa 90 ka adlaw ngadto sa mga medical health worker kinsa nagtrabaho sa mga pribadong tambalanan sa Dakbayan sa Sugbo.

Si Mayor Edgardo Labella nagkanayon nga iyang nakita ang karisgo sa ilang trabaho gumikan sa ilang pag-atiman sa mga pasyente sa coronavirus disease (Covid-19).

Gipasabot ni Labella nga siya nasayod nga ang mga medical personnel sa pribadong mga tambalanan mas ubos og gidawat itandi sa mga nagtrabaho sa ospital sa gobiyerno.

Busa, alang kaniya, taliwa sa nahitabo karon, angay lang nga sila abagangan sa kagamhanan.

“Atong nakita nga kining naa sa private hospitals ang doctors, nurses et al, atong namatngonan nga ang ila intawon nga sweldo almost katunga ra sa gidawat sa atong government doctors, nurses , medtechs , radio technologists, respiratory technologists.

Para pag boost sa ilang morale ,tungod kay kon ikompara sa government workers, gamay ra man gyud ang ilang sweldo,” padayag ni Labella. Apan ang mayor nibutyag nga kinahanglan pa kining aprobahan sa City Council nga gipangulohan ni Bise Mayor Michael Rama.

“Maghangyo ta sa SP pinangulohan ni Vice Mayor Michael Rama ug atong chairman sa Budget and Finance ( Konsehal Raymond Garcia) to look into the possibility of giving P10,000 per month for the next thre months for these private medical health workers para intawon madugangan (ilang sweldo) because we know the risk they are facing in the fight against this invisible Covid-19,” dugang sa mayor.

Siya nibutyag nga nahuman na siya og konsulta sa Local Finance Committee ug aduna na silay nakitang tinubdan sa pundo para maoy ihatag sa mga medical health worker.

Partikular sa mga tambalanan diin nagagikan ang mao nga mga medical health worker mao ang Chong Hua Hospital, Cebu Doctors University Hospital, Miller Hospital, Cebu Velez Hospital, Perpetual Succor Hospital ug Visayas Community Medical Center.

Ang mayor niingon nga adunay kapin o kulang 1,800 ka mga medical health workers gikan sa maong mga ospital nga maoy mahatagan sa maong insentibo balor og P30,000 sud sa tulo ka mga buwan. (PAC)


Source: Sun.Star Superbalita (https://www.sunstar.com.ph/article/1862403/Superbalita-Cebu/Balita/Labella-nagtinguhang-mohatag-og-P30K-sa-medical-workers?ref=rss&format=simple&link=link)

No comments