Recent Posts

Breaking News

Kawani sa Kapitolyo, Mandaue modawat og ‘hazard pay’


MOKABAT sa P37 milyones ang gigahin sa pangagamhanan sa lalawigan sa Sugbo alang sa hazard pay o special Covid-19 allowance ug suhol alang sa frontliners nga nasakop sa lalawigan sa Sugbo.

Samtang ang 4,000 ka mga kawani sa kagamhanan sa dakbayan sa Mandaue adunay madawat nga dugang P200 matag adlawa sa susamang dugang sa ilang suholan.

Ang Kapitolyo mi-aprobar sa pundo nga kapin sa P1.2 bilyones nga supplemental budget sa Hunta Probinsyal niadtong Hunyo 6, 2020.

Lakip na niini ang P37 milyones alang sa compensation adjustment ubos sa Salary Standardization Law diin nalakip na diha ang benefits sa frontliners.

Ang maong kantidad bahinon sa upat ka mga provincial ug district hospitals nga padayon nga nag operate sukad sa Marso 30 hangtod na sa Mayo 20 atol sa pagsugod ang Enhanced Community Quarantine (ECQ).

Sa maong kantidad moabot sa P6 milyones ang gibahin alang sa Balamban Provincial Hospital, P6.3M Danao City Provincial Hospital, P5.7M Carcar City Provincial Hospital ug P5.9M Bogo City Provincial Hospital.

Samtang sa mga District Hospitals moabot P2.9M ang gigahin alang sa Bantayan District Hospital, P2.7M Ricardo Maningo Memorial Hospital, Camotes is., P1.2M Minglanilla District Hospital, P1M Juan Dosado Memorial Hospital, Sogod, moabot P906,000 usab alang sa M.J. Cuenco Memorial Hospital sa Malabuyoc, ug tag P880,000 sa Tuburan District Hospital ug Isidro Kintanar Memorial Hospital, Argao.

Lakip usab sa makadawat mao ang Badian District Hospital-P707,000; Oslob District Hospital-P592,000; Barili District Hospital-P552,000; Daanbantayan District Hospital- P550,000; ug Jose Maria Borromeo Memorial Hospital sa Pinamungajan- P520,000.

MANDAUE

Samtang gipirmahan na ni Mandaue City Mayor Jonas Cortes ang ordinansa nga maghatag og hazard pay ngadto sa mga empleyado sa gobyerno sa dakbayan ilabi na niadtong misakripisyo sa pagserbisyo panahon ning pandemya.

Ang tanang empleyado sama sa mga regular, job order ug contractual makadawat sa maong kantidad.

Nalatid sa ordinansa nga gipermahan ni Cortes nga ang mga empleyado nga pisikal nga moadto sa ilang trabaho gikan sa Marso 30, 2020 hangtod sa Mayo 31, 2020 ang makadawat og hazard pay.

Giklaro ni Atty. John Eddu Ibanez, ang executive secretary ni Cortes, nga kadtong lang mga adlaw nga pisikal nga mitambaong ang us aka kawani ngadto sa ilang tagsa-tagsa ka mga buhatan ang iphon alang sa maong dugang suholan.

Dugang niya nga kadtong mga adlaw nga nag-work from home ang empleyado dili ma-apil sa pag-ihap sa hazard pay. (ANV, KFD)


Source: Sun.Star Superbalita (https://www.sunstar.com.ph/article/1862797/Superbalita-Cebu/Balita/Kawani-sa-Kapitolyo-Mandaue-modawat-og-hazard-pay?ref=rss&format=simple&link=link)

No comments