Recent Posts

Breaking News

Kaso sa ASF mitaas; ground zero nasubay


KIDAPAWAN CITY -- Misaka na sa 235 ka mga baboy ang gipatay, gisunog ug gilubong tungod sa pag-igo sa African Swine Fever (ASF) sa Magpet, North Cotabato.

Kini ang gikompirma ni NoCot Provincial Veterinarian Dr. Rufino Suropia nga gideklara nga ground zero sa ASF ang Barangay Poblacion sa maong lungsod ug mikuyanap kini ngadto sa mga barangay Ilian, Magcaalam, Basak ug Bantac.

Moabot sa 78 ka tag-iya og mga baboy ang apektado ug kapin sa P1 milyon ang damyos niini.

Tungod niini, girekomenda sa Municipal Disaster Risk and Reduction Management Council nga ipailawom sa state of calamity ang tibuok Magpet gumikan sa pagkuyanap sa ASF.

Giangkon ni MDRRM Officer Donald Homez nga dili paigo ang ilang pundo sa Quick Response Fund o QRF isip dugang tabang sa mga naapektuhan nga magbababoy gumikan sab sa pag-igo sa coronavirus disease (Covid-19).

Gitutukan sab sa Task Force ASF ang ubang barangay sa Magpet nga posibleng nakontamina sa kagaw.

Gidili na karon ang pagsulod sa mga binuhing baboy sa Magpet, apil na ang mga frozen meat products aron malikayan ang pagkuyanap sa ASF. (EEF)


Source: Sun.Star Superbalita (https://www.sunstar.com.ph/article/1864073/Superbalita-Davao/Balita/Kaso-sa-ASF-mitaas-ground-zero-nasubay?ref=rss&format=simple&link=link)

No comments