Recent Posts

Breaking News

Kapuyo gipatay tungod sa selos?


SELOS ang gitumbok nga rason nga gipatay sa usa ka lalake ang iyang kapuyo sud sa ilang panimalay sa Sityo Jica, Barangay Lao, Ormoc City.

Ang insidente nahitabo pasado alas 12 sa kaadlawon, Biyernes, Hulyo 17, 2020.

Giila ang biktima nga si Genevive Larigo, 32, usa ka helper sa usa ka tindahan og mga itlog sa merkado publiko.

Samtang, ang suspek mao ang kapuyo nga si Roel Nierves, 36, nagpuyo sa nahisgutang lugar.

Si Nierves giingong baldado na human nadisgrasya sa miaging tuig ug ang biktima nalang ang nibuhi niini lakip ang duha ka anak.

Sa wala pa mahitabo ang krimen, pasado alas 4 sa hapon sa Hulyo 16, Huwebes, niuli ang biktima gikan sa trabaho ug nihapit sa balay sa inahan niini.

Ang suspek giingong naa ubos sa impluwensya sa ilimnon nga makahubog human nakig-inom sa iyang mga higala.

Kilom-kilom na nauli ang biktima sa ilang pinuy-anan gikan sa iyang inahan ug naabtan sa suspek.

Nitumaw ang panaglalis sa duha gumikan sa pangabubho sa suspek ngadto sa iyang kapuyo ug niresulta sa krimen.

Lawom na ang gabii apan wa nahuman sa ilang lalis ang duha hinungdan nga ang suspek nikuha og kutsilyo ug gitusaktusak ang biktima.

Gidala sa Ormoc District Hospital (ODH) ang biktima apan gideklarar kini nga dead on arrival. Kapin kon kulang 20 ang giingong samad dinunggaban nga naangkon sa biktima hinungdan sa iyang kamatayon.

Gidala usab sa ODH ang suspek kay nisuway usab kini pagdunggab sa iyang kaugalingon human sa pagpatay sa iyang kapuyo.

Wala ra kini magdugay og gidala sa presinto aron maimbestigaran ug gihan-ay na ang mga dokumento alang sa pagpasaka og kaso nga homicide batok ni Nierves nga gitanggong na karon.


Source: Sun.Star Superbalita (https://www.sunstar.com.ph/article/1864061/Superbalita-Cebu/Balita/Kapuyo-gipatay-tungod-sa-selos?ref=rss&format=simple&link=link)

No comments