Recent Posts

Breaking News

Kapulisan modonar og blood plasma sa mga kritikal sa Covid


POLICE Regional Office (PRO)-Central Visayas mopadayon sa ilang pagdonar og blood plasma ngadto sa mga pasyente sa coronavirus disease (Covid-19) nga grabe ang kahimtang.

Ang 91 ka mga pulis nga nangaayo na gikan sa mao nga sakit maoy makuhaan og blood plasma.

Si PRO-Central Visayas chief Police Brigadier General Albert Ignatius Ferro nipahibawo nga niadtong Hunyo nisugod sila pagdonar, diin duha ka mga pasyente sa Covid-19 nga kritikal ang kahimtang maoy nakapahimus.

Daling naka-recover ang mao nga mga pasyente sa usa ka pribadong tambalanan sa Dakbayan sa Sugbo.

Ang duha nakauli na sa ilang balay.

“Yeah we’ve been doing that for the past one month. Naa na kami na donate-tan duha na naka recover nga Covid positive nga seriously ill. Kami naghatag. So, duha na nakabalik na sa ilang mga balay. So, tanan naga donate na kami sa plasma convalescent and blood transfusion,” matod ni Ferro.

Tipik kini sa ilang pagpasalamat nga sa 223 ka mga pulis nga nasakit og Covid, 91 na niini ang nangaayo ug makapauli na sa ilang tagsa ka pamilya.

Ang blood plasma dunay anti-bodies nga gituohang magamit pagkombate sa Covid-19. Kuhaon kini gikan sa mga pasyente sa Covid nga negatibo na sa sakit.

Bisan tuod kon wa pay lapad nga mga pagtuon nga nagkompirmar nga kini epektibo batok sa Covid-19, gisuwayan gihapon kini sa mga tambalanan ubos sa pagtugot sa Department of Health (DOH)-Central Visayas.

“Our recovery rate also with the police is 91 na ang atong naka recover and they are volunteer plasma and blood donors for all Covid positive here in Cebu,” dugang ni Ferro.

Nanghinaot ang hepe sa kapulisan sa Rehiyon 7 nga daghan ang maluwas nga kinabuhi sa ilang gihimo.

Iyang giawhag usab ang uban nga mohatag usab sa mga nanginahanglan. (AYB)


Source: Sun.Star Superbalita (https://www.sunstar.com.ph/article/1862847/Superbalita-Cebu/Balita/Kapulisan-modonar-og-blood-plasma-sa-mga-kritikal-sa-Covid?ref=rss&format=simple&link=link)

No comments