Recent Posts

Breaking News

Kapa gi-raid; 2 patay, founder nasikop


DUHA ka mga tawo ang napatay ug usa ang samdan dihang ang kapulisan nidakop sa Kapa-Community Ministry International (Kapa) founder Joel Apolinario sa usa ka hilit nga resort sa Lingig, Surigao del Sur sa Martes, Hulyo 21, 2020 mga lima ka buwan human ang usa ka lokal nga korte nimando sa pagdakop kaniya tungod sa kasong investment fraud.

Usa ka taho gikan sa Caraga Police Regional Office niingon nga ang kapulisan ni-serve og arrest ug search warrants batok kang Apolinatio mga alas 7:30 sa buntag sa Martes dihang ang iyang sumosunod nakigpinusilay sa mga pulis.

Duha ka wa mailhing mga tawo nangaangol samtang usa ka Melecio Siano naangol.

Matod sa kapulisan nga nakasakmit sila sa crime scene sa sityo Dahican, Barangay Handamayan sa mosunod: 30 units sa M16 rifle; duha ka units sa M4 rifle; usa ka Garand rifle; tulo ka M60 machine guns; usa ka .50 caliber sniper rifle; tulo ka caliber .22 rifles; usa ka Carbine rifle; usa ka shotgun; duha ka rocket propelled grenade (RPG) ; lima ka .45 caliber pistols ug nagkadaiyang mga bala.

Si Kapa spokesperson Bong Cagape, hinuon, niingon sa Facebook post nga si Apolinario nitahan sa kapulisan.

“Sumuko na sa batas si founder Joel Apolinario para harapin sa batas ang mga paratang sa kanya nandoon na po ang mga legal team para mag-asikaso,” matod ni Cagape.

“Pero ‘wag po tayong mag-alala dahil magpapatuloy po ang mga plano na pagpapatakbo ng mga negosyo para sa mga malilikom ay magbabalik na ng mga perang dinonate ng mga members. Continue praying po sa ating Pastor Joel at malampasan po nating lahat ang kinakaharap ngayon,” siya nidugang.

Mga warrant of arrest giluwatan niadtong Pebrero 11, 2020 sa Regional Trial Court sa Bislig City batok kang Apolinario ug uban pang mga opisyal sa Kapa tungod sa mga kasong investment fraud kun pagpangilad.

Ang mga kaso nagagumikan sa mga reklamong gipasaka sa Securities and Exchange Commission (SEC) sa Hunyo 18, 2019, nga namasangil sa pagpagpamaligya o pagtanyag sa pagbaligya o pag-apod-apod sa securities sa publiko nga way pagtugot.

Ang SEC niingon nga ang Kapa niddani sa publiko sa pagbubo og puhonan nga labing minos P10,000 bugti sa 30 porsyentong binuwan nga ginansya sa tibuok kinabuhi, nga kalapasan sa Republic Act No. 8799, kun Securities Regulation Code (SRC).

Napalgan usab sa SEC ang Kapa nga nigamit sa Ponzi scheme, usa ka investment program nga nagtanyag og imposibleng taas nga ginansya ug nibayad sa investors gamit ang contribution sa laing investors.

Sa Septiyembre 2019, ang Department of Justice niuyon sa findings sa SEC ug nipasaka og kaso batok sa Kapa. (SunStar Philippines)


Source: Sun.Star Superbalita (https://www.sunstar.com.ph/article/1864347/Superbalita-Cebu/Balita/Kapa-gi-raid-2-patay-founder-nasikop?ref=rss&format=simple&link=link)

No comments