Recent Posts

Breaking News

Kamahal sa bayad sa lubong gisanta ni Chan


GISURPRISA sa pagbisita ni Lapu-Lapu City Mayor Junard Chan ang publikong sementeryo sa Barangay Gun-ob sa Miyerkules, Hulyo 22, 2020.

Kini human makadawat og taho nga adunay tulo ka mga tawo sa naasoyng sam-ang nga nagpasulabi sa ilang paningil og bayad sa paglubong.

Sumala sa mayor, P12,000 maoy pangayo sa mga tawong nagpailang tiglubong. Ang regular nga bayad mobalor lang og P3,000-P5,000 dala ang lapida.

Usa kini ka dakong pagpangwarta nga mahulog na hinuon nga gisakyan ang panahon sa pandemiya, matod ni Chan.

Gumikan sa kapuno sa pampublikong sam-ang sa Humay-Humay Road, mapugos ang mga Oponganon og dagan sa Municipal Cemetery gumikan sa lagda sa Department of Health (DOH) nga kinahanglan ilubong dihadiha dayon ang mamatay, bisan dili tungod sa Covid-19, ning panahona.

Gawas sa kamahal sa paningil sa mga tawo sa sam-ang, giklaro usab ni Chan nga dili sila awtorisado nga mohimo og transaksiyon sa lugar sanglit ang sam-ang gipanag-iya sa gobyerno. Walay nasayran si Chan nga aduna siyay tawo nga gitugotan nga makahimo ug transaksiyon sa pagpalubong sa dapit.

Gumikan niini, gimandoan ni Chan ang City Legal Office nga ipatawag ang tulo ka tawo nga iyang naatlang dunay gitrabaho sa sam-ang.

Ang tulo ka tawo wala lang una panganli niining mantalaan samtang wala pay pormal nga reklamo.

“Ang atong administrasyon dili mo tolerate sa mga abusadong mga tawong miabuso sa atong pobreng mga kaigsuonan,” matod ni Chan. (GCM)


Source: Sun.Star Superbalita (https://www.sunstar.com.ph/article/1864438/Superbalita-Cebu/Balita/Kamahal-sa-bayad-sa-lubong-gisanta-ni-Chan?ref=rss&format=simple&link=link)

No comments