Recent Posts

Breaking News

Kalapasan sa protocol sa panglawas sa Naga dunay dakong multa


MULTA nga moabot og P2,000 ug pagkabilanggo ang atubangon sa mga indibidwal nga makalapas sa usa ka ordinansa sa dakbayan sa Naga.

Ang establisementong makalapas mapasirad-an usab.

Kini kabahin sa mandatory nga pagsul-ob og face mask ug ang pagpatuman sa estriktong physical distancing sa mga establisemento o sa publikong lugar.

Ang maong kamandoan subay sa ordinansa sa dakbayan.

Ang pagsul-ob og face mask una na nga gimando sa mga opisyal sa Department of Health (DOH) aron dili makatakod sa bisan unsa nga sakit sama sa coronavirus disease sa mga tawo nga masugatan niini o ba kaha mahimong makaestorya.

Ang mga indibidwal nga molapas sa maong kamandoan magmulta og P500 sa first offense ug kinahanglan nga mosalmot sa Covid-19 workshop ug seminar.

Sa ikaduhang paglapas, makamulta og P1,000 ug bilangguon. Samtang sa ikatulong kalapasan, magmulta na kini og P2,000 ug pagkabilanggo sulod sa tulo ka buwan.

Ubos sa maong ordinansa, kinahanglan nga ang tanan nga mga establisemento ug mga tindahan, gagmay man o dagko, mosubay sa health protocols sama sa pagbutang og hand sanitizers o alcohol aron pag-disinfect, mga marka usab alang sa pag-physical distancing.

Alang sa mga establisemento nga dili motuman, suspensohon ang operasyon niini sulod sa pito ka adlaw sa first offense, 14 ka adlaw sa second offense samtang revocation sa permit niini ang atubangon sa ikatulong offense.

Ang mga kalsada ug mga agianan sa dakbayan sa Naga gipamutangan na og mga dagkong lingin nga may tagsa ka metros nga gilay-on aron maoy tamakan sa mga tawo ilabi na sa panahon nga maghuwat kini og masakyan o ba kaha mo palit.

Kini paagi sa dakbayan nga malikayan ang pagkatap sa coronavirus disease sa mga konstituwente niini. (ANV)


Source: Sun.Star Superbalita (https://www.sunstar.com.ph/article/1862556/Superbalita-Cebu/Balita/Kalapasan-sa-protocol-sa-panglawas-sa-Naga-dunay-dakong-multa?ref=rss&format=simple&link=link)

No comments