Recent Posts

Breaking News

Kabalaka sa mga nurse ning panahon sa Covid


MGA kabalaka sa mga nurse sa Sugbo gustong ipadangat sa ilang kahugpongan ngadto kang Environment Secretary Roy Cimatu, overseer sa Covid response sa Dakbayan sa Sugbo.

Diskriminasyon, hazard pay, mga suliran sa quarantine facility ug kakuwang sa personal protective equipment ang pipila sa mga butang nga gusto nilang hisgutan uban kang Cimatu.

Tungod niini, ang Philippine Nurses Association (PNA)-Cebu Chapter, pinaagi sa ilang presidente nga si Joseph Stephen Descallar, nisuwat kang Cimatu niadtong Hunyo 26, 2020 aron hisgutan uban kaniya ang hiniusang mga kabalaka sa mga nurse sa Sugbo.

Matod niya nga ilang tinguha nga masabtan ang mga tinguha sa mga nurse ning sitwasyon karon sa frontlines pinaagi sa pagpakigsulti sa nagkadaiyang mga institusyon ug stakeholders.

Sa pagkakaron, wa pa sila makadawat og tubag sa Inter-Agency Task Force (IATF).

Matod ni Descallar nga daghan nang mga nurse ang nang-submit sa ilang resignation letters, labina sa pribadong mga tambalanan sa Dakbayan sa Sugbo ug Mandaue, samtang dunay nang-absent without official leave.

Wa hinuon silay tukmang data kay kini confidential ug di ibutyag sa mga ospital.

Si Descallar niingon nga nagsugod sila og himog survey sa mga nurse sa pribado ug pampublikong ospital sa Sugbo sa tumong nga ilang makita ang tinud-anay nga sitwasyon sa mga nurse. Ang survey matapos sa Biyernes, Hulyo 10 ug ang resulta gamiton paghimog mga lakang sa pagpalambo sa kahimtang sa mga nurse.

PANGINAHANGLAN

Gawas sa pisikal nga pag-abag sa mga nurse, doktor ug ubang health care workers nga naa sa frontline batok sa Covid-19, mahinungdanon usab nga tagdon ang kahimtang sa ilang panghuna-huna ug emosyonal nga panginahanglan.

Si Anna Kathrina Watin, usa ka Cebuana nga clinical psychologist, niingon nga dunay tulo nga maisip nga mahinungdanon alang sa medical frontliners nga nakasinati og talagsaong stress.

Kini naglakip sa ilang kaluwasan, nga mahimong mahatagan og kaseguraduhan pinaagi sa paghatag kanilag dormitoryong kapuy-an, transportasyon; kaluya nga makuhaan pinaagi sa pagdugang og personnel ug paghatag kanila og tukmang allowances ug benepisyo, ug kahimtang sa panghuna-huna pinaagi sa debriefing ug counselling.

“The job of a nurse is not only physically taxing but it is emotionally laborious," matod ni Watin sa iyang chat tali sa SunStar Cebu. (WBS)


Source: Sun.Star Superbalita (https://www.sunstar.com.ph/article/1862926/Superbalita-Cebu/Balita/Kabalaka-sa-mga-nurse-ning-panahon-sa-Covid?ref=rss&format=simple&link=link)

No comments