Recent Posts

Breaking News

Jeepneys sa lalawigan makapasaherog balik


NITUGOT si Department of Transportation Secretary Arthur Tugade sa pag-operate sa mga jeepney sa probinsya sa Sugbo.

Mao kini ang gipahibawo ni Cebu Governor Gwendolyn Garcia atol sa iyang live presser sa Hulyo 20, 2020 sa lungsod sa Barili.

Gibutyag sa gobernador nga nihangyo siya kang Tugade nga i-waive una ang kasamtangan nga han-ay sa pag-deploy sa mga public utility vehicle (PUV) sa kadalanan.

“Misugot si Secretary Tugade nga makabalik ug dagan kining atong mga jeepneys,” matod ni Garcia.

Apan gipasabot niya nga sa pagkakaron anha lang una sa mga barangay road paagion ang mga PUV nga mahimong tighatod sa mga pasahero nga mosakay og bus o minibus paingon sa trabahoan.

Sa nasabutan, gikinahanglan usab nga makapasar sa road worthiness test sa Land Transportation Office (LTO) ug Land Transportation Office (LTFRB).

“Basta dili lang kagang-kagang kana inyong mga jeepney, subject to inspection kana karon sa LTO ug LTFRB, subject to roadworthiness. Kana nga inspection, then mahimo na nga makabalik,” matod ni Garcia.

Iyang gipasidan-an ang mga operator nga bisan og makabalik na sa pag-operate ang mga jeepney, dili pa kini mahimong makabalik sa regular nga rota.

Apan mao na kini ang iyang sunod nga hangyo sa kalihim.

“Ang among sabot ni Secretary Tugade akong ipaabot karon ang akong sulat kaniya nga naghangyo nga makabalik kamo sa pag padagan sa inyong mga rota,” dugang sa gobernador.

Wa pay petsa kon kanus-a maka operate pag-usab ang mga jeepney sa orihinal nga rota sa kadalanan, apan matod ni Garcia kinahanglan nga mo huwat una sa pormal nga anunsyo sa DOTr alang niini.

Ang hangyo sa pagpadagan pag-usab sa mga PUV usa sa mga gihangyo sa mga drayber sa probinsya nga usa sa mga sektor nga labing apektado sa pagsira sa kadalanan, pagpahigayon og community quarantine tungod sa pandemya.

Sa pagkakaron, niumol na og grupo ang operators ug drivers pagpangandam na usab sa jeepney modernization program sa gobyerno.


Source: Sun.Star Superbalita (https://www.sunstar.com.ph/article/1864214/Superbalita-Cebu/Balita/Jeepneys-sa-lalawigan-makapasaherog-balik?ref=rss&format=simple&link=link)

No comments