Recent Posts

Breaking News

Ilegal nga sugal sa Bohol ipasusi


GIMANDOAN sa hepe sa Police Regional Office (PRO) 7, Police Brigadier General Albert Ignatius Ferro, ang officer-in charge sa Bohol Provincial Police Office (BPPO) sa pag-imbestigar sa migawas nga taho nga adunay nagpadula sa peryahan ng bayan nga usa ka matang sa sugal sa maong probinsya nga gipaagi sa social media.

Matod ni Gen. Ferro, sukad siya milingkod nga pangulo sa kapulisan sa Central Visayas hugot na siya sa iyang mando nga puhagon ang bisan unsa nga matang sa illegal nga sugal.

Natingala ang heneral nganong mibalik ang maong matang sa sugal nga wala pa man gani mosugod ang mga programa sa Philippine Charity Sweepstakes Office tungod sa Covid-19 pandemic.

Tungod niini, matod niya, nga kinahanglan nga susihon kini sa hepe sa kapulisan sa probinsya sa Bohol nga si Police Colonel Joselito Clarito.

“Im directing the provincial director of Bohol to investigate such information and come up with the very drastic act on this illegal gambling facilitator or whoever they are,” sigon ni Ferro.

Nakita na usab niya ang pag-draw sa peryahan ng bayan sa usa ka social media account sa Bohol diin nag-live pa kini.

Pasabot ni Ferro nga hugot nila kining gidili tungod kay mahimong diha magsugod ang pagkatap sa coronavirus panahon sa pagpapusta niining nagpadagan sa illegal gambling.

Nasagmuyo siya nga taliwala sa kalisdanan nga gisagubang karon sa katawhan tungod sa virus apan aduna pay mihimog illegal nga kalihukan sama sa illegal nga sugal.

Ipaubos usab niya sa imbestigasyon kon kinsa ang mitugot nga mo-operate sa illegal gambling ang peryahan ng bayan.

Dugang niini nga kon masuta nga aduna siyay sakop nga nalambigit niini, dili siya magduhaduha sa pagparelibo sa katungdanan ug mag-atubang kinig kaso.

Atol sa paglingkod sa katungdanan ni Ferro sa PRO-7, mibahad dayon siya sa mga police nga malambigit sa illegal nga sugal nga iya kining gukdon.

Dungan sa iyang pagpirmag manifesto sa no take policy sa tanang matang sa illegal.

Si Col. Clarito una nang mibutyag sa mga tigbalita nga wala siya maka-monitor nga nibalik ang operation sa illegal gambling sa tibuok probinsya sa Bohol.

Apan aduna matod pa siyay gitahasan nga mosusi kon unsa kini ka tinuod aron masikop nila ang nagpasiugda niiini. (AYB)


Source: Sun.Star Superbalita (https://www.sunstar.com.ph/article/1863327/Superbalita-Cebu/Balita/Ilegal-nga-sugal-sa-Bohol-ipasusi?ref=rss&format=simple&link=link)

No comments