Recent Posts

Breaking News

Hoops Dome himuong isolation facility


GIKATAKDANG himuong isolation facility sa kagamhanan sa dakbayan sa Lapu-Lapu ang Hoops Dome sa Barangay Gun-ob tungod sa nagsakang gidaghanon sa mga pasyente sa coronavirus disease (Covid-19).

Kini aron mahimong kabutangan sa mga mild ug asymptomatic nga mga pasyente sa Covid-19.

Mao kini ang nadesisyonan ni Lapu-Lapu City Mayor Junard Chan.

Nunot niini, mokuha og dugang mga medical personnel ang Siyudad.

Ang Dakbayan sa Lapu-Lapu duna nay kapin sa 1,000 ka mga pasyente sa Covid-19.

Matod ni Chan nga inanay nang napuno ang kasamtangan karong isolation facility sa dakbayan sa mga mild ug asymptomatic nga mga pasyente gumikan sa padayong pagsaka sa kaso sa Covid-19.

Gawas sa Hoops Dome, ang gawas niini butangan usab og mga makeshift isolation facility alang gihapon sa mga pasyente.

Duha ka semana ang bana-bana sa mayor nga mahuman ang pagahimong isolation facility sa Hoops Dome.

Trabahuon kini sa Department of Public Works and Highways (DPWH) pinaagi sa abag sa Office of the Presidential Assistance for the Visayas (OPAV).

MANG-HIRE

Gumikan niini, gikatakda usab nga mang-hire ang kagamhanan og dugang mga doktor, nurse ug ubang medical personnel gikan sa Department of Health (DOH) aron makaatiman sa mga pasyente nga masulod sa mga isolation facility.

Aron usab masolusyonan ang paghuot sa mga pasyente sa Lapu-Lapu City District Hospital, nadesisyonan ni Chan nga ilahi ang mga manganakay ngadto sa Lapu-Lapu City Puericulture and Maternity sa Barangay Poblacion.

Kini aron mas mahatag ang espasyo sa tambalanan sa mga pasyente sa Covid ug sa ingon malikay usab ang mga manganakay gikan sa virus.

Gumikan kay ang puericulture aduna lay usa ka delivery room, hayan gikatakdang magbuhat ang kagamhananan og dugang operating room ug mang-hire usab og dugang obstetrician-gynecologist (OB gyne) aron makaatiman sa manganakay.

“Ato tong gamiton ug adto ibutang ang mga manganakay una (puericulture),” matod ni Chan.

ISOLATION FACILITY: Tungod sa nagsakang mga kaso sa coronavirus disease (Covid-19), plano ni Mayor Junard Chan nga gamiton nga isolation facility ang Hoops Dome sa Dakbayan. / FILE


Source: Sun.Star Superbalita (https://www.sunstar.com.ph/article/1863162/Superbalita-Cebu/Balita/Hoops-Dome-himuong-isolation-facility?ref=rss&format=simple&link=link)

No comments