Recent Posts

Breaking News

Gwen moapelar alang sa PUVs


SA tinguha nga makadagan ang mga public utility vehicle (PUV)s ubos sa gipaluagan nga quarantine restrictions, moapelar si Cebu Governor Gwendolyn Garcia sa nasodnong kagamhanan nga i-waive una ang kasamtangan nga han-ay sa pag-deploy sa mga PUV sa kadalanan.

Subay sa impormasyon gikan sa Sugbo News, ang news portal sa Kapitolyo, gikatakda nga mopadala og pormal nga suwat si Garcia sa Department of Transportation (DOTr), Land Transportation Franchising and Regulatory Board (LTFRB), ug Inter-Agency Task Force (IATF) alang sa maong hangyo.

“So ako maoy mosuwat sa DOTr ug IATF requesting for a provisional authority nga i-waive usa to ang hierarchy pending the approval of your application..." tipik sa taho.

Ang maong desisyon nahiusahan sa Hulyo 17, atol sa tigum sa mga opisyal gikan sa LTFRB, Land Transportation Office (LTO), operators ug drivers sa mga PUJ, transport groups ug representante sa bangko.

Matod sa gobernador, nga lakip sa suwat niini ang basehan o pruweba nga moabot sa 80 porsiyento sa mga jeepney driver ug operator sa lalawigan ang naghiusa isip grupo ug kini isip pagsanong sa nag-ung-ong nga jeepney modernization nga programa sa gobiyerno. (ANV)


Source: Sun.Star Superbalita (https://www.sunstar.com.ph/article/1864095/Superbalita-Cebu/Balita/Gwen-moapelar-alang-sa-PUVs?ref=rss&format=simple&link=link)

No comments