Recent Posts

Breaking News

Garcia mokiha sa 7 ka opisyal nga 'nanigbakay'


MOPASAKA og kaso ang Cebu Provincial Capitol sa mga opisyal nga niapil sa gipahigayon nga tigbakay sa Lungsod sa Daanbantayan niadtong Sabado, Hulyo 25, 2020.

Kini maoy gipahibawo ni Cebu Governor Gwendolyn Garcia atol sa press conference sa Kapitolyo sa Hulyo 29, 2020.

Mipadayag si Garcia nga dismayado siya sa maong mga opisyal nga mao na hinuoy nangulo sa ilegal nga sugal.

“Ako mismo tungod kay gipasahan man ni og provincial ordinance. Ako mismo maoy mo file og kaso batok ninyo under our provincial ordinance kay naay penal clause ang provincial ordinance,” butyag sa gobernador.

Ang Police Regional Office nitumbok sa usa ka mga konsehal sa mga lungsod ug tulo ka mga barangay kapitan nga nangapil sa bigtime nga tigbakay, apan nakadagan.

Giklaro ni Garcia nga sukad sa pagpaubos sa community quarantine sa lalawigan sa Sugbo, kanunay nga malakip sa lagda nga striktong gidili ang pagpahigayon og tari, sugal o ba kaha tigbakay.

Atol sa miaging press conference sa gobernador, una na usab niining gipahinumdoman ang mga opisyal sa lungsod ug barangay nga maoy mangulo sa pagpatuman sa kamandoan ug dili maoy mangulo sa pagsupak niini.

“Kon ang ordinaryo nga citizen og di mopatuo, silotan. Kay naa may order, naa may decree. Pero para nako, mas bug-at ang imong sala kon opisyal ka mismo. Basaha intawn nag balik inyong gipanumpaan. Basaha, sabta ug tulisuka inyong kaugalingon kon gituman ba ninyo inyong gipanumpaan,” matod ni Garcia.

Nasikop ang 23 ka mga tawo nga nagtigbakay sa Sityo Tagasa, Barangay Bitoon,a lungsod sa Daanbanatayan sa Hulyo 25, 2020. Pito kanila nailhan sa kapulisan nga mga elected official sa lalawigan.

Ang tulo ka kapitan giila nga sila si: Narciso Osabel sa Maharuhay, Medellin; Arnold Arcipe sa Dayhagon, Medellin ug Rodelo Diamante sa Colonia lungsod, Tuburan. Samtang ang mga konsehal sa lungsod mao silang Bernardito Luche sa Daanbantayan, Buena Pontillas sa Tuburan ug Moman Rivera ingon man si Abdon Cabahug taga Borbon, Borbon.

Gawas nga milapas kini sa lagda sa Inter Agency Task Force sa Covid-19 (IATF), misupak usab sila sa kamandoan sa Probinsya pagdili sa maong kalihukan.

“Kita unta nga mga officials, gipili ta sa katawhan. Nanumpa ta. I will uphold all laws, legal orders and decrees promulgated by the duly constituted authorities. Unya executive order mana adopted by the Provincial Board so we are duly constituted authorities nga gidili lagi ni natong tigbakay. Nagpakauwaw mo sa inyong gipanumpaan ang Probinsya maoy mo file og charges ninyo,” dugang sa gobernador.

Gibaharan ni Garcia ang tanan nga mga opisyal nga mahimong mapasakaan og kaso kon padayon nga mosupak sa balaod ilabi na ning panahon sa pandemya. (ANV)


Source: Sun.Star Superbalita (https://www.sunstar.com.ph/article/1865262/Superbalita-Cebu/Balita/Garcia-mokiha-sa-7-ka-opisyal-nga-nanigbakay?ref=rss&format=simple&link=link)

No comments