Recent Posts

Breaking News

Duterte: Cebu City hotspot sa Covid


GIHULAGWAY ni Presidente Rodrigo Duterte nga hotspot sa coronavirus infections ang Dakbayan sa Sugbo hinungdan nga ubos gihapon kini sa enhanced community quarantine (ECQ) gikan sa Hulyo 1 hangtud 15, 2020.

Ang Cebu City lang gihapon ang nag-inusarang lugar sa tibuok nasod nga ubos sa ECQ, ang labing estriktong quarantine level.

Ang Cebu City usab ang dunay labing daghang mga kaso sa coronavirus diseases (Covid-19) sa tibuok nasod.

Si Duterte niingon nga di unta kini mahitabo kon ang mga Sugboanon di pa “gahi og ulo.”

Kadaghanan sa mga Sugboanon, matod sa Presidente, wa mosunod sa mga quarantine protocol.

Iyang gitandi ang Metro Manila sa Sugbo nga mas daghan og mga tawo, apan kinabag-an, misunod sa mga protocol.

“Cebu is now the hotspot of Covid. Marami sa inyo hindi sumunod,” matod ni Duterte sa iyang nasudnong pagpamulong atol sa iyang pakigtigom sa piniling mga sakop sa iyang Kabinete, Hunyo 30, 2020.

Matod niya nga wa siya makakita og grabeng pagpanglapas sa mga quarantine protocol sa Metro Manila, labina sa Greater Manila Area.

“Kamong mga Cebuano masuko mo, gahi mog ulo. Ayaw mog kainsulto kay Cebuano ko. I am a Cebuano. I come from Danao, Cebu. Kamong mga Bisaya talaga, maski sa Davao, yung mga Bisaya doon, ang titigas talaga ng ulo. Di mo mapasunod. Yun ang totoo,” matod sa Presidente.

GCQ, MGCQ

Ang Inter-Agency Task Force (IATF) for the Management of Infectious Diseases nipahibawo, pinaagi kang Health Secretary Francisco Duque III, sa Martes sa gabii, sa quarantine status sa nagkadaiyang mga dapit sa nasod.

Sa Sugbo, ang mga Dakbayan sa Mandaue ug Lapu-Lapu nagpabilin sa general community quarantine (GCQ).

Tulo ka mga dapit sa Lalawigan sa Sugbo, Talisay City, mga lungsod sa Consolacion ug Minglanilla, nagpabilin sa GCQ.

Ang tulo ka mga dapit maoy labing taas og mga Covid-19 infections sa tibuok lalawigan.

Ang ubang mga dapit sa Lalawigan sa Sugbo ubos na sa mas lugak nga modified GCQ, usa ka tikang na lang sa “new normal.”

Si Duque niingon nga ang pagpabilin sa ECQ sa Dakbayan sa Sugbo giuyonan ni Environment Secretary Roy Cimatu, chief overseer sa Covid-19 Response sa Dakbayan sa Sugbo.

Si Cimatu daan nang niingon nga ang ECQ maoy iyang girekomendar kang Duterte base sa iyang naobserbahan nga “alarming” nga mga pagpanakod sa Covid-19 sa Siyudad sa Sugbo.

Nabalaka si Cimatu kay ang porsyento sa mga resulta sa swab testing mas taas kon itandi sa national average.

Alang usab niya, di ordinaryo ang gidaghanon sa nangamatay sa mao nga sakit dinhi sa dakbayan.

Ang ubang mga dapit sa Central Visayas, nga naglakip sa Bohol ug Negros Oriental, ubos na sab sa MGCQ. (REV)


Source: Sun.Star Superbalita (https://www.sunstar.com.ph/article/1862059/Superbalita-Cebu/Balita/Duterte-Cebu-City-hotspot-sa-Covid?ref=rss&format=simple&link=link)

No comments