Recent Posts

Breaking News

Davao way planong mobalik sa ECQ, GCQ


GIBUTYAG ni Mayor Sara Duterte-Carpio nga bisan og nagkataas ang kaso sa coronavirus disease (Covid-19) sa Siyudad sa Davao, di mohangyo ang siyudad nga mobalik sa mas taas nga matang sa community quarantine.

Kini maoy nahimong tubag ni Duterte-Carpio atol sa paghinabi kaniya sa 87.5 FM Davao City Disaster Radio niadtong Biyernes, Hulyo 10, 2020, sa dihang gipangutana kon ang kagamhanan mohangyo ngadto Inter-Agency Task Force on Emerging Infectious Diseases (IATF-EID) aron nga ibalik ang general community quarantine (GCQ) o enhanced community quarantine (ECQ).

Matud sa mayor, "Wala ta'y ing-ana nga plano nga mag-appeal sa ECQ or GCQ."

Kahinumdoman nga ang mayor subling nagsulti nga ang dakbayan di manghilabot sa klasipikasyon sa IATF. Apan iyang gikanayon nga ang lokal nga panggamhanan hinuon nagsumite og mga pertinenteng mga dokumento bahin sa tubag sa siyudad sa Covid-19, naglakip sa mga bag-ong natala nga kaso. Busa, iya na lang gisalig ang hukom bahin niini sa IATF.

Sa kasamtangan, ang siyudad naa ilawom sa modified general community quarantine hangtud sa Hulyo 15.


Source: Sun.Star Superbalita (https://www.sunstar.com.ph/article/1863274/Superbalita-Davao/Balita/Davao-way-planong-mobalik-sa-ECQ-GCQ?ref=rss&format=simple&link=link)

No comments