Recent Posts

Breaking News

Dalagita ‘gilugos’ sa silingan


CONSTRUCTION worker gipusasan human gipasanginlan sa iyang menor de edad nga silingan nga nilugos kaniya.

Ang 23 anyos nga ulitawo, taga Barangay Libertad, Dakbayan sa Bogo, nadakpan sa iyang trabahoan niadtong Lunes sa alas 3 sa hapon, Hulyo 27.

Ang ngan sa suspek ug biktima gipugngan sa kapulisan.

Si Police Staff Sergeant Meluna Mansing, sa Women’s and Children’s Protection Desk (WCPD) sa Bogo City Police Station nga nahinabi sa Superbalita Cebu, nagkanayon nga ang 14 anyos nga dalagita nitug-an sa iyang ginikanan nga gilugos siya ni Junx (di tinuod nga ngan) niadtong Dominggo sa alas 6:00 sa gabii.

Ang pagpanglugos maoy ikaduhang higayon nga gihimo ni Junx kaniya kay gipahimuslan na diay siya niadtong Hulyo 8. Apan tungod sa iyang kahadlokm wa siya malasulti gilayon.

Si Daisy (di tinuod nga ngan), tinun-an sa grade 8, nisaysay nga giteksan siya ni Junx nga pasuroyon sa balay niini.

Di Daisy niadto sa balay ni Junx nga duol ra sa ilaha, apan matod niya nga gilugos dayon siya niini.

Sumala ni Mansing nga si Daisy na-trauma pa ug wa na mohatag og dugang detalye kon nganong niadto sa sab siya sa balay ni Junx.

“Mohilak man gud siya. Giteksan ra siya duha ka higayon dayon inig adto niya lugoson,” dugang ni Mansing

Dihang gidakop, si Junx hugtanong nanghimakak nga iyang gilugos si Daisy.

Gitug-an niini nga sinabutan nilang duha sanglit gitago nila ang ilang relasyon sukad pa niadtong 2019.

Apan si Daisy hugot sab nga nanghimakak nga duna silay relasyon.

Nagtuo si Mansing nga posibling gihulga ni Junx ang dalagita sanglit nagpabilin ang kahadlok niini. (GPL)


Source: Sun.Star Superbalita (https://www.sunstar.com.ph/article/1865106/Superbalita-Cebu/Balita/Dalagita-gilugos-sa-silingan?ref=rss&format=simple&link=link)

No comments