Recent Posts

Breaking News

Curfew sa tungang gabii; falls off limits


BUOT ni Cebu Governor Gwendolyn Garcia nga hatagan pa og mas dugay ang pagsugod sa oras sa curfew sa Probinsya sa Sugbo.

Kini tungod kay gitugot na ang mas taas nga oras nga makaabli ang mga kan-anan ug fastfood chains ubos sa modified general community quarantine (MGCQ) zones.

Subay sa guidelines sa Memorandum 20-39 S. 2020 nga giluwatan sa Department of Trade and Industry (DTI), gipatas-an na og 75 porsyento ang operating capacity sa dine-in sa food establishments.

Ubos sa lagda, mahimo na usab nga maka serve og mga ilimnon, apan kutob lang sa duha ka servings.

“If you go over the DTI Guidelines 20-39, maayo ning balita sa atong resto kay gi-allow na up to 75 percent capacity ug gawas pa ana gi-extend pa ang curfew,” matod ni Garcia sa Hulyo 20, 2020.

Alang sa pamilya nga buot mangaon sa restaurants, mahimo nang mag-uban sa usa ka lamesa basta makapakita og pruweba nga nagpuyo kini sa usa ka panimalay ug musunod gihapon sa physical distancing measures. Ang tanan nga restaurants ug fastfood chains mahimo na nga mag-operate kutob alas 11 sa gabii.

Usa ka executive order ang gikatakda nga luwatan ni Garcia nga subayon sa kalungsoran alang sa hiniusang curfew.

“Akong gihangyo ang mga LGU nga i-extend ang curfew up to 12 midnight... I will be issuing an executive order incorporating the new DTI guidelines,” matod ni Garcia.

Sa kasamtangan nga curfew sa Lalawigan, magsugod kini sa alas 10 sa gabii hangtod sa alas singko sa buntag.

Gipasidan-an ang mga Sugboanon sa probinsya nga ang mga batan-on nga nag edad 21 paubos gidid-an pa sa paggawas, lakip na ang mga senior citizen ug immunocompromised nga mga tawo.

FALLS OFF LIMITS PA

Bisan pa man og gipaubos na sa MGCQ, di pa tugotan ang pagkaligo sa waterfalls sa Probinsiya sa Sugbo.

Matod ni Garcia nga di pa luwas gikan sa pagkatakod sa sakit sama sa coronavirus disease, kon tugotan na ang pagkaligo ilabi na nga sagad sa mga moduaw magpundok.

Ubos sa MGCQ, gitugot na ang tourism activities apan kinahanglan nga estriktong tumanon ang mga health protocol sama sa 50 porsyento nga operational capacity, physical distancing ug uban pa.

Ang Probinsya sa Sugbo padayon nga naghan-ay sa mga lagda ug proseso alang sa pagbukas og balik sa turismo.

Mipahibaw usab si Garcia nga moluwat siya og executive order nga maoy tumanon sa mga resort owner ug sa mga turista.

Giuyonan sa mga negosyante ang pagbukas na sa turismo aron makabawi kini sa pagkalusno sa kita tungod sa epekto sa pandemya.


Source: Sun.Star Superbalita (https://www.sunstar.com.ph/article/1864439/Superbalita-Cebu/Balita/Curfew-sa-tungang-gabii-falls-off-limits?ref=rss&format=simple&link=link)

No comments