Recent Posts

Breaking News

Covid free nga mga nasud


PAGBUTO sa coronavirus disease niadtong hinapos nga bahin sa 2019 didto sa nasud sa China, unang gituohan nga magpundo lang ang virus sa maong dapit ug wa damha nga motapon sa laing mga nasud.

Apan pipila lang ka semana paspas ang pagkatap sa Covid-19 nga nahimong global pandemic nga nakapa-alarma sa kinabag-an, taho gikan sa Aljazeera.

Sigun sa Science nga ang maong virus nga hinungdan sa respiratory illness ang daling motakod sa laing tawo pinaagi sa “droplets of bodily fluids” sama laway o sip-on nga mi-epekto ngadto sa 188 ka mga nasud sa tibuok kalibutan.

Tungod niini, nipagawas og health protocol ang mga health ug government official sa nagkadaiyang nasud sama nalang sa pagtamod sa social distancing ug paglikay sa daghang tapok sa mga tawo.

Base sa labing uwahi nga data nga nahipos sa Johns Hopskins University, usa private research facility nga nagbase sa Baltimore, Maryland, USA nga moabot ngadto sa 14.9 milyones ka tawo ang na-infected sa maong virus.

Ang global death toll moabot sa 616,000 ug adunay 8.4 milyones nga pasyente ang nanga-ayo.

COVID FREE

Apan taliwala sa maong pandemic ania ang 12 ka mga nasud nga way nataho nga kaso sa Covid-19.

Ang mga nasud mao ang; Kiribati, Marshall Islands, Micronesia, Nauru, North Korea, Palau, Samoa, Solomon Islands, Tonga, Turkmenistan, Tuvalu ug Vanuatu.

Sagad sa nahisgutang nasud mga isla nga nasakop sa Oceania continent nga adunay gamay ra ang populasyon, gawas lang sa nasud sa North Korea.

Ang Republic of Kiribati nga nahimutang sa central Pacific Ocean nga adunay kapin sa 110,000 ang populasyon.

Ang Marshall Island nga anaa sab sa central Pacific Ocean nga gitung-an sa Hawaii ug Philippines nga adunay namuyo nga 58,413 ang populasyon base sa talaan niadtong 2018.

Samtang ang Federated States of Micronesia nahimutang sa western Pacific Ocean nga gilangkuban sa 600 ka isla, ug laing gamay nga isla nasakop sa Micronesia ang Nauru nga anaa sa northeast sa nasud sa Australia ang way mga kaso sa maong virus.

Nalahi ang nasud sa North Korea nga anaa sa East Asia, diin sayod ang kadaghanan nga ang ilang citizens dili gawasnon sa pag-travel diha sa nagkadaiyang dapit sa North Korea.

Kontrolado sab sa ilang kagamhanan ang emigration ug immigration hinungdan nga dili sayon ang pagsud-gawas ilabi na sa mga langyaw.

TALAAN

Ang World Health Organization (WHO) nipagawas sa ilang updated nga datos sa mga nasud nga adunay labing taas nga konpirmado nga nagpositibo sa Covid, gidaghanon sa mga namatay ug sa mga nangayo.

Samtang ang nasud sa China diin nagsugod ang coronavirus disease nahimutang sa ika-26 nga dapit diin ang ilang konpirmado nga kaso moabot sa 86,226, adunay 4,655 ang nangamatay ug 78,840 ang nanga-ayo.

Ang Pilipinas anaa sa ika-30 nga dapit nga adunay confirmed cases nga 72,269 samtang 1,843 ang nangamatay ug 23,623 ang naka-recover.


Source: Sun.Star Superbalita (https://www.sunstar.com.ph/article/1864546/Superbalita-Cebu/Balita/Covid-free-nga-mga-nasud?ref=rss&format=simple&link=link)

No comments