Recent Posts

Breaking News

Contact tracing di samag tokhang


DI SAMA og tokhang ang contact tracing sa mga tawo nga gikahinagbo sa mga pasyente sa coronavirus disease (Covid-19).

Kay way manulod sa balay nga sakop sa contact tracing team kon wa sa ilang lista ang mga sakop niini.

Gawas pa, ang contact tracing teams pangulohan og medical personnel.

Mao kini ang gipasabot ni Police Regional Director Brigadier General Albert Ignatius Ferro agi og tubag sa mga pagsaway sa giingong house-to-house nga contact tracing nga gipakisama og naggukod sa mga tawo nga nalambigit sa illegal nga kalihukan.

Si Ferro nipasabot nga di sila moadto sa kabalayan kon wala silay basehanan sanglit gipaagi nila kini sa mga impormasyon nga ilang makuha gikan sa mga nagpositibo sa Covid-19.

“It is being exaggerated, that it’s like a tokhang. No. It will be a simple interviewing of the concerned, because we will not go to the houses if we have no basis, that these people have been engaged with the positive or confirmed individual. People have their own opinion and I respect their opinion. But this is for the good of the majority,” matod ni Ferro.

Ang Oplan Tokhang sa Philippine National Police (PNP) mao ang pagbisita sa kabalayan aron awhagon ang mga nalambigit sa illegal nga drugas sa pagtahan sa kaugalingon.

Dugang ni Ferro nga ang publiko giawhag nga mokooperar sa mga pulis.

Siya nipahimangno nga kon mosupak, mahimong mapasakaan og kasong kalapasan sa Republic Act 11332 kun Mandatory Reporting of Notifiable Diseases and Health Events of Public Health Concern Act.

“We need to cooperate....I encourage the Cebuanos to help and collaborate because that’s the only way to graduate from ECQ (enhanced community quarantine or MECQ (modified enhanced community quarantine.) If we could cooperate, we can arrest the spike of the COVID-19 cases,” sigun ni Ferro.

Pasabot niya nga daghan na ang gipangkapoy kon motaas pa ang panahon nga magpadayon nga mapaubos sa MECQ ang Siyudad sa Sugbo.

GIPANALIPDAN

Si Cebu City Councilor Joel Garganera, deputy chief implementer of Inter-Agency Task Force (IATF) Emergency Operations Center (EOC) sa Cebu City, niingon nga sukad nila gisugdan ang ilang contact tracing niadtong Sabado gamit ang bag-ong teams, way reklamo silang nadawat.

Iya usab nga giklaro nga di lang mga pulis ang naglangkob sa tracing teams, naa sab ang medical personnel sa City Health Department (CHD), Bureau of Fire Protection (BFP) ug job order (JO) nga mga kawani.

“So far, wala may may bati nga reaksyon sa mga tawo because our uniformed personnel here are most of them had been Covid-19 positive and have recovered. Almost all of them have donated their plasma. Maayo man ang ilang performance. In fact, they are very courteous because that is part of being a public servant,” matod ni Garganera sa Superbalita Cebu.

Dugang niya nga gigamit ang mga pulis tungod kay sila gibansay nang daan sa cognitive nga interview isip tipik sa ilang trabaho.

“In the conduct of their contact tracing, they are already used to that because of their cognitive skills in investigation. But, wala may problema diri sa Cebu City nga nireklamo ang mga tawo nga adunay improper approach. And I’m proud to say, maayo ilang performance,” dugang ni Garganera.

Bisan pa man sa mga pagsaway, si Ferro niingon nga ila kining ipadayon.

Dungan sa pasalig nga ang mga gipang-trace hatagan nila og proteksyon gikan sa mga tawo nga motamay kanila.

Di angay nga mahadlok ang publiko sa ilang pagbisita sa mga balay sa kabarangayan tungod kay kauban nila ang mga health personnel gikan sa kagamhanan sa dakbayan sa Sugbo ug mga sundawo lakip na mga analyst ug tig interview nga sibilyan.

Masaligon si Ferro nga sa mosunod nga mga adlaw mahimong paspas na ang ilang contact tracing aron masulbad na ang pagsaka sa mga kaso sa Covid 19 sa dakbayan sa Sugbo. (AYB, PAC)


Source: Sun.Star Superbalita (https://www.sunstar.com.ph/article/1863782/Superbalita-Cebu/Balita/Contact-tracing-di-samag-tokhang?ref=rss&format=simple&link=link)

No comments