Recent Posts

Breaking News

Clamping gihingusgan sa Lapu


ALANG lang sa magpataka ug parking sa pampublikong lugar ug kadalanan sa dakbayan sa Lapu-Lapu, kinahanglan nga magmatngon na karon.

Kini gumikan kay ang City Traffic Management System (CTMS) sa dakbayan aduna nay moabot sa 100 ka clamps.

Mao kini ang gibutyag ni Mario Napule ang pangulo sa CTMS dihang nahinabi ning mantalaan.

Sumala pa ni Napule nga sa milabyang semana niabot sa ilang buhatan ang maong mga clamp human nga nakapalit ang kagamhanan sa dakbayan niini.

Pinasubay ang pagpamalit niini sa ordinansa sa dakbayan labot sa ilegal parking.

P1,000 ang multa sa maatlang ma-clamp sa mga sakop sa CTMS base sa ordinansa.

Ang kagamhanan sa dakbayan ubos sa buhatan ni Lapu-Lapu City Mayor Junard Chan giingong kanunay makadawat ug reklamo kalabot sa ilegal parking sa dakbayan.

Gibutyag ni Napule nga sa milabayng mga semana pulos pa warning ang gibuhat sa CTMS sa mga sakyanang nagpataka ug park sa kadalanan ug publikong lugar nga agianan sa mga tawo.

Apan adunay duha ka na sampolan, sumala pa ni Napule, gumikan kay bisan og kapila na nila na warningan wala gayud kini mopatuo.

Lakipsa gidili pag park mao ang duol sa mga fire hydrant sanglit makabalda kini sa kabomberohan sa ilang pagresponde panahon sa sunog.

Giawhag karon ni Napule ang mga Oponganong nanag-iya ug sakyanan ug anaa manimuyo daplin sa dalan sa pagpangita og luna nga maka-park og tarong. (GCM)


Source: Sun.Star Superbalita (https://www.sunstar.com.ph/article/1863913/Superbalita-Cebu/Balita/Clamping-gihingusgan-sa-Lapu?ref=rss&format=simple&link=link)

No comments