Recent Posts

Breaking News

Chan midonar og blood plasma sa DOH


NANAAWAGAN si Lapu-Lapu City Mayor Junard Chan sa mga Oponganon nga naayo na sa coronavirus disease 2019 (Covid-19) sa pagdonar og blood plasma.

Giluwatan kini ni Chan human siya niduaw sa Miyerkules sa buntag, Hulyo 15, sa buhatan Department of Health (DOH) 7 sa OsmeƱa Boulevard, dakbayan sa Sugbo aron magpakuha sa iyang blood plasma.

Si Chan nidonar og blood plasma alang sa mga pasyente nga kritikal nga naa sa mga tambalanan.

Ang mayor positibo sa Sars-Cov-2, kagaw sa Covid-19, mga usa ka buwan kapin na ang nakalabay. Naayo na ang mayor.

MODONAR USAB

Buot nga modonar ni Daanbantayan Mayor Sun Shimura og plasma ngadto sa DOH 7.

Kini human nga naayo na siya sa Covid-19.

Ang maong kalamboan gipahibalo mo Shimura kagahapon, Hulyo 15, 2020.

Base sa pagtuon sa mga eksperto sa panglawas, ang plasma sa usa ka pasyente nga naayo sa Covid-19, makatabang usab kini sa pag- ayo sa laing masakiton.

Gipahibalo sa Shimura nga sa pagkakaron girekomendar una sa doktor kaniya ang pagpahuway.

“Yes, I was thinking about that too (pag donate og plasma). But I am not yet allowed and dili pa pwede for my health, since my lungs is still recovering (based) in my last x-ray, due to its damage caused by Covid pneumonia,” matod ni Shimura sa Superbalita Cebu.

Tungod niini, mahimo na nga makabalik sa pagtungha si Shimura sa iyang opisina, apan kinahanglan nga mosubay gihapon sa estriktong health protocol.

Pinaagi sa usa ka post sa Official page sa lungsod, gipakita niini ang medical certificate pagpamatuod sa pagkaayo na sa mayor.

Bisan sa maong taho, gibutyag sa Mayor nga may pipila gihapon nga wala motuo nga nahiagom siya sa maong sakit.

Apan mapasalamaton siya sa supporta ug mga pag ampo nga gipadangat sa mga konstituente ngadto kaniya panahon nga nakigbatok siya sa covid.

“Back to Daanbantayan very soon! sa mga sigi og issue nga nagpa-Covid-covid ko, I always answer you with documents and papers sa inyong butbot. Ayaw na tawon mog sige pangaway nako ha? buhi and getting healthy nako,” matod ni Shimura.

Nipahibalo si Shimura nga nagpositibo kini sa Covid-19 niadtong Hunyo 21. Siya ang ikaduhang mayor sa Sugbo nga nataptan sa Covid-19.

Padayon nga nanawagan ang lungsod sa mga konstituwente niini sa kanunay nga pagmatngon, pagsubay sa health protocol ug pagpalig-on sa panglawas aron malikay sa risgo sa pagtakboy sa Covid-19. (ANV)


Source: Sun.Star Superbalita (https://www.sunstar.com.ph/article/1863654/Superbalita-Cebu/Balita/Chan-midonar-og-blood-plasma-sa-DOH?ref=rss&format=simple&link=link)

No comments