Recent Posts

Breaking News

Cebu City nagpabilin sa ECQ


MAGPABILIN ubos sa enhanced community quarantine (ECQ) ang Dakbayan sa Sugbo gikan sa Hulyo 1-15.

Ang Cebu City lang gihapon ang nag-inusarang lugar sa tibuok nasod nga ubos sa labing estriktong quarantine level.

Samtang ang mga Dakbayan sa Mandaue ug Lapu-Lapu nagpabilin sa general community quarantine (GCQ).

Tulo ka mga dapit sa Lalawigan sa Sugbo, Talisay City, mga lungsod sa Consolacion ug Minglanilla ang magpabilin sa GCQ.

Ang ubang mga dapit sa Lalawigan sa Sugbo ubos na sa mas lugak nga modified MGCQ.

Mao kini ang nakab-ot nga hukom sa Inter-Agency Task Force (IATF) for the Management of Infectious Diseases nga gipahibawo ni Health Secretary Francisco Duque III atol sa tigom tali kang Presidente Rodrigo Duterte ug pinili nga mga opisyal sa Kabinete sa Martes sa gabii, Hunyo 30, 2020.

Si Duque niingon nga ang pagpabilin sa ECQ sa Dakbayan sa Sugbo giuyonan ni Environment Secretary Roy Cimatu, chief overseer sa Pandemic Covid 19 Response sa Dakbayan sa Sugbo.

Si Cimatu daan nang niingon nga ang ECQ maoy iyang girekomendar kang Duterte base sa iyang naobserbahan nga “alarming” nga mga pagpanakod sa coronavirus diseases sa Siyudad sa Sugbo.

Si Duterte, sa iyang nasudnong pagpamulong atol sa tigom, nibasol sa pipila ka mga Sugboanon nga “subirbeyo” nga maoy hinungdan sa padayong pagpanakod sa Covid-19 sa siyudad.

“Kamong mga Cebuano ayaw mo kasuko nako. Gatrabaho lang ko. Ginabadlong ta mo niadto. Mga subirbeyo mo eh. Dili tanan. Pero naa gyud na sa inyo,” matod sa Presidente.

Ang ubang mga dapit sa region 7, nga naglakip sa Bohol ug Negros Oriental, ubos na sab sa MGCQ. (REV)


Source: Sun.Star Superbalita (https://www.sunstar.com.ph/article/1862052/Superbalita-Cebu/Balita/Cebu-City-nagpabilin-sa-ECQ?ref=rss&format=simple&link=link)

No comments