Recent Posts

Breaking News

Cebu City modawat na og aplikasyon sa LSI aron makauli sa ilang tagsatagsa ka dapit


ANG Cebu City Government pinaagi sa Department of Social Welfare and Services (DSWS) nagsugod na og panawat og aplikante para sa hinabang ngadto sa libuan ka mga locally stranded individual (LSI) dinhi sa dakbayan.

Sa post ni Mayor Edgardo Labella sa iyang official Facebook page, makadawat ang mga LSI hangtod P5,000 depende sa gilay-on sa ilang destinasyon.

Ang mga LSI nga mosakay sa bus, barko o eroplano gikan sa Cebu City paingon sa lalawigan sa Sugbo makadawat og P1,000 hangtod P1,500.

Ang gikan sa Cebu City paingon Negros Oriental, Bohol ug Sequijor makadawat og P1,500 ngadto sa P3,000 samtang ang paingon sa Mindanao ug Luzon makadawat og P3,000 hangtod P5,000 depende sa assessment sa DSWS.

Si City Attorney Rey Gealon kinsa maoy spokesperson ni Mayor Edgardo Labella niawhag sa mga LSI pag-andam na sa mga rekisito.

“Kompletoha ang mga requirements para kung travel authority or availability of travel nalang kinahanglan, dali nalang,” butyag ni Gealon.

Lakip sa mga rekisito nga kuhaon sa mga LSI sa dili pa sila makapahimulos sa financial assistance mao ang government issued ID o valid ID nga nagpakita sa ilang address gawas sa Cebu City, travel authority gikan sa Philippine National Police ug barangay certificate diin natanggong ang LSI sulod sa upat ka buwan.

Si Gealon naglanayon nga kadtong kuwang og dokumento dili atimanon sa DSWS.

Ang maong mga document ipadala sa buhatan ni Konsehal Raymond Garcia pinaagi sa email address nga project.spgarcia@gmail.com ug kadtong walk-ins dili i-entertain sa iyang buhatan gumikan sa hulga sa Covid-19.

Ang kadtong makaduso na sa ilang dokumento, makadawat ra sila og email para sa ilang schedule sa interview didto sa DSWS nga nahimutang sa barangay Labangon ug mahimo sab silang motawag sa 0931-023-0157.

Ang assessment ug ang pag-release sa financial assistance ipahigayon sa DSWS ug kadtong way masakyan mahimo mohangyo para makuha gikan sa ilang lugar paingon sa buhatan sa DSWS.

Nasayran nga daghang local government units (LGUs) sa Kabisay-an ug Mindanao nga ioaubos sa kuwarentina ang mga tawo nga moabot gikan sa Sugbo.(PAC)


Source: Sun.Star Superbalita (https://www.sunstar.com.ph/article/1865260/Superbalita-Cebu/Balita/Cebu-City-modawat-na-og-aplikasyon-sa-LSI-aron-makauli-sa-ilang-tagsatagsa-ka-dapit?ref=rss&format=simple&link=link)

No comments