Recent Posts

Breaking News

Cebu City mag-granular lockdown sa barangays


MOPATUMAN og granular lockdown ang dakbayan sa Sugbo ngadto sa 21 ka mga barangay nga maoy labing daghan og aktibo nga kaso sa Covid-19.

Ang maong desisyon nahukman atol sa tigom uban ni Secretary Roy Cimatu, overseer sa Inter Agency Task Force (IATF), Mayor Edgardo Labella, retired Major General Mel Feliciano, DILG officials ug ubang ahensiya sa gobyerno isip usa sa mga lakang aron mokunhod ang kaso sa virus.

Ang mga barangay nga apektado gilangkuban sa Lahug, Guadalupe, Capitol Site, Talamban, Kamputhaw, Mabolo, Poblacion Pardo, Tisa, Sambag 1, Apas, Labangon, Basak Pardo, Cogon Ramos, Punta Princesa, Sambag 2, Quiot, Zapatera, Banilad, Hipodromo, Basak San Nicolas, Cogon Pardo.

Apan giklaro ni Cimatu nga dili ang tibuok barangay ang i-lockdown kay gikinahanglan nga susihon una sa barangay official ang dapit sa sityo nga maoy ilang pasirhan.

“Instead mag-lockdown sa whole barangay sa identified areas nalang ang ila-lockdown in sitios or purok at the same time yung kalsada na ila-lockdown wala nang madada-anan?” matod pa ni Cimatu.

Bisan sa mga lockdown areas, ang mga trabahante nga gitugotan nga makasulod-gawas ug gikinahangkan nga mahatagan og agi-anan sa mga barangay opisyal.

“Ito yong pinaplano namin so that yung mga workers na nagtrabaho na sa mga binuksan nating mga businesses dito. The workers are supposed to go to this place of work, dapat meron na rin silang corridor na madaanan papunta doon otherwise kong naka-lockdown rin yan hindi sila makadaan,” dugang ni Cimatu.

Si Labella gikatakdang mopagawas og laing executive order para pagpaubos sa granular lockdown sa 21 ka barangay.

Ang mga apektado sa lockdown maoy hatagan og igo nga atensyon sa siyudad pinaagi sa paghatag og ayuda sama sa bugas, de lata ug uban pang nag-unang gikinahanglan aron dili na sila mogawas sa katuyoan nga mopalit sa ilang konsumo.

Ang mga barangay kapitan maoy gitahasan sa pagpatuman kauban ang kapulisan sa barangay lockdown plan. (PAC)


Source: Sun.Star Superbalita (https://www.sunstar.com.ph/article/1864350/Superbalita-Cebu/Balita/Cebu-City-mag-granular-lockdown-sa-barangays?ref=rss&format=simple&link=link)

No comments