Recent Posts

Breaking News

Cebu City di i-hard lockdown


DI TINUOD nga ang tibuok Dakbayan sa Sugbo ipailawom sa hard lockdown pipila ka adlaw sa di pa ang Hulyo 15, 2020.

Kon dunay may hard lockdown, ang ipailawom niini mao ang 20 ka mga barangay nga dunay labing taas nga mga kaso sa coronavirus disease (Covid-19).

Gihimakak ni Police Brigadier General Albert Ignatius Ferro, hepe sa Police Regional Office (PRO) 7, nga siya nisugyot og hard lockdown sa tibuok Cebu City ngadto sa Inter-Agency Task Force for the Management of Emerging Infectious Diseases sulod sa tulo ka adlaw sa di pa ipatuman ang bag-ong quarantine protocol o magpabilin ba ang siyudad sa ECQ.

Matod ni Ferro nga wa nila kini mahisguti sa ilang tigom .

Si Ferro niingon nga di angay tuohan ang mikatap nga impormasyon gawas kon kini gikan sa mga opisyal sa IATF sama kang Environment Secretary Roy Cimatu, kinsa maoy gitahasan ni President Rodrigo Duterte isip overseer sa Covid response sa Dakbayan sa Sugbo.

“For those that are spreading, unless its coming from a a public official from NIATF, from the group of General Cimatu, then we have to confirm it with them, if these are rumors,” matod ni Ferro.

Hinuon, gitug-an ni Ferro nga adunay gisugyot si Secretary Carlito Galvez, IATF chief implementer, nga labing maayo nga ipaubos sa hard lockdown kadtong mga barangay nga adunay taas ang kaso sa Covid 19 sulod sa tulo ka adlaw dungan sa pagpa test sa mga posibling carrier sa virus.

Human sa tulo ka adlaw kon masuta ang resulta, ipang isolate ang mga magpositibo ug luagan na dayon ang gihimong lockdown sa barangay, apan wala pa kini maaprobahi.

“Ang suggestion ni Secretary Galvez is if you have a like for instance a barangay has highest number of Covid positive, ang suggestion nya is i-lockdown siya. Then after three days, pag tanan clear by numbers lang nag positive, ila lang i-isolate then we release this area, granular lang, dili tong tanan,” dugang ni Ferro.

Natingala ang PRO-7 director kon diin gikan ang nanggawas nga mga impormasyon nga wala man siya mopasupot og sugyot ngadto sa IATF.

Nagduda ang heneral nga adunay grupo nga dauton ang kapulisan ug ang mga opisyal nga naglangkob sa IATF tungod sa ilang hidden agenda aron i-sabotahe ang pagbatok sa Covid sa dakbayan sa Sugbo.

Giangkon usab ni Ferro nga inig abot sa Hulyo 15, wa pa sila masayod kon mag general community quarantine naba ang tibuok dakbayan.

Apan iyang isugyot nga hinay-hinay lang una ngadto sa modified ECQ sanglit nagpadayon pa ang ilang gihimong contact tracing.

Mohimo silag obserbasyon sulod sa pito ka adlaw kon padayon ba nga misunod ang mga tawo sa minimum health standard sama sa pag sul-ob sa facemask ug physical distancing.

Dili sila magpasagad sa ilang mga desisyon human nga naleksyon sila sa National Capital Region nga nag GCQ, misaka na hinuon ang mga kaso sa Covid sa maong rehiyon.

Ang gihimo karon sa PRO-7 mao ang pagkuha sa takdo nga listahan gikan sa Cebu City Health Department sa Dakbayan sa Sugbo ug Department of Health alang na sa ilang sub-sub nga contact tracing aron makuha nila ang tinuod nga hulagway sa Covid 19. (AYB)


Source: Sun.Star Superbalita (https://www.sunstar.com.ph/article/1863260/Superbalita-Cebu/Balita/Cebu-City-di-i-hard-lockdown?ref=rss&format=simple&link=link)

No comments