Recent Posts

Breaking News

CCPO sa mga kapitan: tabang mo og bantay


HEPE sa kapulisan sa Dakbayan sa Sugbo miawhag sa mga barangay kapitan nga bantayan ang ilang dapit aron di manggawas sa balay ang ilang mga lumolupyo.

Giluwatan kini ni Cebu City Police Office (CCPO) officer-in-charge Police Colonel Josefino Ligan human nakuhaan og hulagway sa SunStar Cebu nga nanggawas ang mga tawo sa Barangay Tejero sa dihang milabay na ang mga sakop sa Special Action Force (SAF) niadtong Lunes sa hapon, Hulyo 6, 2020.

Nakuhaan og hulagway sa SunStar Cebu ang pagpanggawas sa mga bata sa ilang mga balay ug ubang mga residente sa wala na ang mga sakop sa SAF nga nagpatrolya sa maong dapit.

Daghan ang nakasaway tungod kay daw sa way kahadlok sa coronavirus disease (Covid-19) ang mga namuyo tungod kay wa mag sul-ob og facemask samtang naa sila sa gawas.

Tungod niini, gitawgan ni Ligan si Barangay Kapitan Hermogenes Galang Jr. ug ang hepe sa Waterfront police station.

“Dili man ta 24/7 nga naay pulis diha sa kada lugar gyud.So, ato gi-encourage ang mga barangay official nga to police their own ranks and at the same time during sa recorida, kuyog sila. Mokuyog labi nang mga barangay tanod. Then from time to time, may recorida gyud diha nga area,” matod ni Ligan.

Magpadayon ang pakigdayalogo sa kapulisan sa mga barangay official aron mapugngan kining mga tawo nga manggawas sa balay nga way mask.

Gipang-ila usab nila kinsa nga mga barangay official nga namuyo sa matag sitio aron sila na ang mobantay ug mo-report dayon sa kapulisan kon adunay manggawas ug magtapok sa usa ka dapit.

“Continuous ang atong pakig dialogue labi na sa barangay officials kay ilaha man gyud nang area. Gi-identify pud namo katong sa picture kon naa bay konsehal or barangay tanod ato nga area para maoy atong i-tap as one of the force multipliers nga maoy mo badlong sa mga tawo didto,” dugang ni Ligan.

Giangkon ni Ligan nga aduna pay mga barangay nga problema pa pasundon ang mga tawo tungod sa kagahig ulo, apan kadaghanan, matod niya, misunod na sa protocol sa gobyerno.

Awhag niya sa publiko labi na sa mga molopyo sa dakbayan sa Sugbo nga dili na manggawas sa ilang kabalayan aron mahuman na ang enhanced community quarantine (ECQ).

“Kon magsige ra tag ingun ani, mag cat and mouse, basig hangtod August ECQ gihapon ta,” pahimangno ni Ligan.

Si Police Regional Office (PRO) 7 chief Brigadier General Albert Ignatius Ferro niingon nga dunay mga barangay kansang mga lumolupyo maniid lang sa mga pulis.

Busa iyang gihangyo ang mga barangay official sa pag-abag kanila sa pagbantay.

Matod niya nga naggamit na sila og drones sa pagbantay sa mga barangay busa angay nga magmatngon ang manglapas sa mga protocol kay dunay mga mata sa kahanginan ang kapulisan. (AYB)


Source: Sun.Star Superbalita (https://www.sunstar.com.ph/article/1862805/Superbalita-Cebu/Balita/CCPO-sa-mga-kapitan-tabang-mo-og-bantay?ref=rss&format=simple&link=link)

No comments